मुख्यमंत्री नीतीश कुमार मिथिला क्षेत्रीय बिहारक पश्चिम चंपारणक वाल्मीकिनगरमे एकटा चुनावी सभाकेँ संबोधित करैत कहलनि कि बिहारमे जाति आधारित जनगणनामे ९४ लाख परिवार गरीबी रेखासँ नीचा जीवन यापन करैत पाओल गेल अछि। जाति आधारित जनगणनामे भेटल जानकारीक अनुसार सरकार हुनकर उत्थानक लेल काज कऽ रहल अछि। मुख्यमंत्री नीतीश कुमार कहलनि जे बिहारक १० लाख नव लोककेँ रोजगार देल जाएत। प्रत्येक वर्गकेँ ओकर संख्याक अनुसार आरक्षणक लाभ देबाक तैयारी अछि। बगहाकेँ राजस्व जिला बनयबाक संकेत दैत नीतीश कुमार कहलनि जे बिहारक कतेको क्षेत्रमे काज चलि रहल अछि। जल्दिये सरकार एकरा लेल एकटा पैघ निर्णय लेत।
बिहारक मुख्यमंत्री नीतीश कुमार एनडीए गठबंधनक जदयू उम्मीदवार सुनील कुमारक समर्थनमे वाल्मीकिनगर निर्वाचन क्षेत्रक लेल जनसभाकेँ सम्बोधित कयलनि। सभाकेँ सम्बोधित करैत नीतीश कुमार कांग्रेस पर हमला करैत कहलनि कि जाति आधारित गणनाकेँ विरोध करयवाला पिछड़ाक लेल आरक्षणक बात करैत छथि।
जीविका आ महिला आरक्षणक उदाहरण दैत मुख्यमंत्री नीतीश कुमार कहलनि जे बिहारक योजना पूरा देशमे एकटा उदाहरण प्रस्तुत करैत अछि।
मुख्यमंत्री नीतीश कुमार कहलनि जे आब ओ हर परिस्थितिमे एनडीए केर संग रहताह। ओ कतहु नहिं जयताह। नीतीश कुमार कहलनि कि दू बेर एक संग रहबाक प्रयास कयलौंह, मुदा ओ सभ गड़बड़ करय लगलाह। एहि लेल हम हुनका सभकेँ भगा देलहुं। एम्हर मुख्यमंत्री नीतीश कुमार एनडीए उम्मीदवार सुनील कुमारक जीतक अपील कयलनि। नीतीश कुमार अल्पसंख्यक मतदाता सभसँ आह्वान करैत कहलनि जे बिहारमे अल्पसंख्यक समाजक लेल ओतेक काज कियो नहिं कयलक जतेक ओ कयलनि अछि। कार्यक्रममे जदयू केर राज्यसभा सांसद संजय झा, बिहार सरकारक मंत्री विजय चौधरीक संग एनडीए केर सभ नेता उपस्थित छलाह।
