देशमे पहिल बेर मोबाइल एपक माध्यमसँ वोटिंग भेल। शनिकेँ बिहारक 26 जिलाक 42 नगर पालिकाक उपचुनाव भेल। कुल 62.41 प्रतिशत वोटिंग भेल। ई-वोटिंग, बूथ वोटिंगसँ अधिक दर्ज भेल। ई-वोटिंगक माध्यमसँ करीब 70 प्रतिशत मतदान भेल।
बिहारक उपमुख्यमंत्री सम्राट चौधरी एहि उपलब्धि उपर प्रसन्नता व्यक्त कएलन्हि। उपमुख्यमंत्री सम्राट चौधरी कहलन्हि जे बिहारक लेल ई खुशीक समय अछि। बिहारक नगर निकायक चुनावमे ई-वोटिंगक माध्यमसँ 70 प्रतिशत मतदान भेल। एहि स्वयंमे एकटा अनोखा प्रयोग अछि। बिहार पहिल राज्य अछि जतए ई-वोटिंग द्वारा मतदान भेल अछि।
दोसर दिसि सामाजिक सुरक्षाक मामिलामे भारतक दोसर स्थान पर आबय पर उपमुख्यमंत्री सम्राट चौधरी कहलनि जे प्रधानमन्त्री नरेंद्र मोदीक नेतृत्वमे गरीब, महिला लोकनि, युवा आ किसानक कल्याण भऽ रहल अछि।
दरअसल, बिहार देशमे पहिल बेर ई-वोटिंग करबाक रिकॉर्ड अपन नाम कएलक। शनिकेँ नगर निकाय आम चुनाव आ उपचुनावमे ऑनलाइन निबंधित 70 प्रतिशत मतदाता सभ अपन मोबाइलसँ ई-मतदान कएलनि। चुनावमे पटना, बक्सर, रोहतास, सारण, बांका आ पूर्वी चंपारणक विभिन्न नगर निकायक मतदाता सभ अपन मताधिकारक इस्तेमाल कयलनि। ई-वोटिंग करए वाला लोकनिमे 72.01 प्रतिशत पुरुष आ 63.38 प्रतिशत महिला छथि। 51 हजार मतदाता एहि लेल पंजीकरण कएने रहथि। मुदा, तीन निकायक तीन सीटक लेल मतदान स्थगित भेलाक बाद कुल 38 हजार ऑनलाइन मतदाता पंजीकृत रहलथि।
राज्य निर्वाचन आयोग सेहो एकरा पैघ उपलब्धि मानैत अछि। चुनावमे ऑनलाइन आ सामान्य मिला कऽ 62.41 प्रतिशत मतदान भेल। 184 वार्ड पार्षद, छह-छह उपमुख्य पार्षद आ मुख्य पार्षदक सीटक फैसला होबएवला अछि। वोटक गिनती 30 जूनकेँ होएत। कहल जा रहल अछि जे आयोगक सदा प्रयास रहल अछि जे प्रत्येक मतदाताकेँ स्वतंत्र, निष्पक्ष, पारदर्शी, उत्तरदायित्वपूर्ण आ सुलभ मतदान प्रक्रिया उपलब्ध कराओल जाए। एहि उद्देश्यक पूर्ति लेल ई-वोटिंगक प्रयोग कएल जा रहल अछि।
