बिहारक मुख्यमंत्री नीतीश कुमार पत्रकारक संबंधमे एकटा पैघ घोषणा कयलनि। ओ पात्र पत्रकारकें देल जाय वाला पेंशन केर राशि बढ़ाबय केर फैसला कयलनि।
बिहारमे विधानसभा चुनाव आबि रहल अछि। सब राजनीतिक दल चुनावी तैयारीमे व्यस्त अछि। एहि बीच बिहारक मुख्यमंत्री नीतीश कुमार पत्रकारक संबंधमे एकटा पैघ घोषणा कयलनि। ओ पात्र पत्रकारकें देल जाय वाला पेंशनक राशि बढ़ाबय केर फैसला कयलनि। एखनि धरि बिहारमे पात्र पत्रकारकें माह 6 हजार टका भेटैत छल, मुदा आब इ राशि बढ़ा कए 15 हजार टका प्रति माह भऽ गेल अछि।
अपन सोशल मीडिया प्लेटफॉर्म एक्स पर जनतब दैत मुख्यमंत्री नीतीश कुमार लिखलनि जे, “हमरा ई बताबैत खुशी भऽ रहल अछि जे बिहार पत्रकर सम्मान पेंशन योजना केर तहत आब विभागकें निर्देश देल गेल अछि जे हर महीना सब पात्र पत्रकारकें 6 हजार रुपयाक बदला 15 हजार रुपयाक पेंशन राशि उपलब्ध कराओल जाय। एकर संग-संग बिहार पत्रकर सम्मानक तहत पेंशन प्राप्त करय वाला पत्रकारकें मृत्युक स्थितिमे पेंशन योजना, हुनकर आश्रित पति / पत्नी केर आजीवन तीन हजार रुपया प्रति माह केर बजाय 10 हजार रुपयाक पेंशन राशि देबाक निर्देश देल गेल अछि।
एकर अलावा ओ आगू लिखलनि कि लोकतंत्रमे पत्रकारक महत्वपूर्ण भूमिका अछि । “लोकतंत्र केर चारिम स्तंभ अछि, आ सामाजिक विकासमे एकर अहम भूमिका छै, हम शुरूसॅं पत्रकारक सुविधाकें ध्यान राखने छियै, ताकि ओ अपन पत्रकारिता निष्पक्ष रूपसॅं कय सकय आ सेवानिवृत्तिक बाद सम्मानजनक तरीकासॅं अपन जीवन जी सकय।”
बिहार विधानसभा चुनावसॅं पहिने सीएम नीतीश कुमार बहुत रास घोषणा कय चुकल छथि। एहिसॅं पहिने सामाजिक सुरक्षा पेंशन योजनाक राशि बढ़ा देल गेल छल। बुजुर्ग, दिव्यांग आ विधवाकेँ देल जाय वला मासिक पेंशनकें 400 रुपया सॅं बढ़ा कय 1100 रुपया कय देल गेल अछि, एकर अलावा 125 यूनिट धरि मुफ्त बिजली उपलब्ध करेबाक घोषणा सेहो कयल गेल अछि।
