चुनाव आयोग राहुल गांधीक ‘वोट चोरी’क आरोपकेँ गैर जिम्मेदाराना कहलक

नई दिल्ली
*

भारत निर्वाचन आयोग लोकसभामे नेता प्रतिपक्ष राहुल गांधीक आरोपकेँ पूर्ण रूपसँ खारिज कय देलक अछि, जाहिमे कांग्रेस नेताक दावा छल जे ईसीआई भाजपाक संग मिल कय चुनावमे धांधली कय रहल अछि। चुनाव आयोग राहुल गांधीक आरोपकेँ निराधार बताबैत कहलक जे ओ निष्पक्ष, पारदर्शी आ स्वतंत्र तरीकासँ चुनाव करय लेल प्रतिबद्ध अछि।

चुनाव आयोगक सूत्रक अनुसार, चुनाव आयोग कहलक, हम एहि तरहक निराधार आरोपकेँ अनदेखी करैत छी आओर बेर-बेर धमकीक बावजूद सभ चुनाव अधिकारीसँ आग्रह करैत छी जे एहि गैर जिम्मेदाराना बयान पर ध्यान नहि दिअ आओर अपन कर्तव्य पर ध्यान दिअ।

आयोग देश भरिक मतदान कर्मीक समर्थन करैत आग्रह कयलनि कि ‘गैर जिम्मेदाराना आ राजनीतिक रूपसँ प्रेरित’ टिप्पणीसँ विचलित नहिं होबाक चाही।

संसद परिसरमे पत्रकारसँ बात करैत राहुल गांधी दावा कयलनि कि हुनका लग चुनावी गड़बड़ीक ‘ठोस सबूत’ अछि, जकरा ओ ‘एटम बम’ तक बतैलनि।

ओ कहलनि जे, जौं ई सबूत सोझाँ आबि गेल तँ चुनाव आयोगकेँ नुकेबाक कोनो जगह नहि रहत।

राहुल गांधी कहलनि जे, हम कहलहुँ जे वोट चोरी भऽ रहल अछि आ आब हमरा सब लग एकर ठोस प्रमाण अछि जे चुनाव आयोग एहिमे शामिल अछि।

ओ २०२३ केर मध्य प्रदेश विधानसभा चुनाव, २०२४ लोकसभा चुनाव आ महाराष्ट्रमे मतदाता सूची संशोधनमे गड़बड़ीक आरोप लगौलनि।

ई पहिल बेर नहि अछि कि राहुल गांधी चुनाव आयोगक कामकाज पर सवाल उठैलनि। कांग्रेस नेता द्वारा एहि साल जूनमे लिखल एकटा लेखमे महाराष्ट्र विधानसभा चुनावमे पैघ पैमाना पर धांधलीक आरोप छल।

तखनि चुनाव आयोगक सूत्र स्पष्ट कएने छल जे संवैधानिक निकाय तखने आधिकारिक तौर पर जवाब देत जखनि विपक्षक नेताक रूपमे राहुल गांधी औपचारिक लिखित शिकायत दर्ज कराओत।

राहुल गांधी अपन लेखमे महाराष्ट्र चुनावमे ‘मैच फिक्सिंग’ केर आरोप लगैलनि आ कहने छलथि कि भविष्यक चुनावमे सेहो ऐहन हेरफेर भऽ सकैत अछि, खास कय ‘जतय भाजपा हारय लागैत अछि।

ओ सब महाराष्ट्रमे मतदानक अंतिम घंटामे मतदान केंद्रक सीसीटीवी फुटेज मंगने छलाह, जाहिमे एहि प्रक्रियामे गड़बड़ीक दावा कयने छलाह।

मांगक जवाब दैत चुनाव आयोगक सूत्रक कहब छल जे मौजूदा नियमक अनुसार चुनावी याचिकाक मामिलामे, जरूरत पड़ला पर, मतदान केंद्रक सीसीटीवी फुटेज संबंधित हाईकोर्टसँ जांचल जा सकैत अछि।