चुनाव आयोग आदर्श आचार संहिताक उल्लंघनक आरोपमे प्रधानमंत्री नरेन्द्र मोदी आ कांग्रेस नेता राहुल गाँधीकेँ अपन भाषणक लेल स्वत: संज्ञान नोटिस जारी कयलक अछि। निर्वाचन आयोग दुनू दलसँ २९ अप्रैलकेँ भोर ११ बजे धरि जवाब मँगने अछि। भाजपा आ कांग्रेस दुनू एक दोसरक नेताक विरुद्ध चुनाव आयोगमे शिकायत दर्ज कयने छल, जाहिमे आरोप लगाओल गेल छल जे ओ लोकक बीच घृणा फैला रहल छथि आ धर्म, जाति, समुदाय आ भाषाक नाम पर अलगाववादकेँ बढ़ावा दैत छथि।
एहि मामिलामे निर्वाचन आयोग जनप्रतिनिधित्व अधिनियमक धारा ७७क शक्तिक उपयोग करैत स्टार प्रचारकसभक आचरणक लेल पार्टी अध्यक्षसभकेँ उत्तरदायी ठहरौलक अछि आ दुनू दलक अध्यक्षकेँ नोटिस जारी कयलक अछि। निर्वाचन आयोग नोटिस केर जवाब २९ अप्रैलक भोर ११ बजे तक देबाक निर्देश देलक अछि। निर्वाचन आयोग कहलक जे राजनीतिक दलकेँ अपन उम्मीदवार, स्टार प्रचारकक आचरणक जिम्मेदारी लेबय पड़त।
विशेष रूपसँ शीर्ष पद पर रहनिहार लोकक प्रचारक क्रममे एहन भाषण आओर बेसी चिन्ताजनक होइत अछि आ एकर गम्भीर परिणाम भऽ सकैत अछि।
हालहिमे राजस्थानमे एकटा रैलीक दौरान पीएम मोदी कहने छलाह जे जँ कांग्रेस सत्तामे अबैत अछि तँ ओ घुसपैठिया आ बेसी बच्चाकेँ जन्म देनिहारमे लोकक सम्पत्ति बाँटि देत। प्रधानमंत्री पूर्व प्रधानमंत्री मनमोहन सिंहक एकटा पुरान बयानक उल्लेख कयलनि, जाहिमे मनमोहन सिंह कहने छलाह जे देशक संसाधनसभ पर अल्पसंख्यक समुदायक पहिल अधिकार अछि। एहि मामिलामे कांग्रेस चुनाव आयोगसँ अपील कयलक जे पीएम मोदीक बयान विभाजनकारी आ दुर्भावनापूर्ण अछि आ ई आदर्श आचार संहिताक स्पष्ट उल्लंघन अछि। कांग्रेस चुनाव आयोगकेँ १४० पृष्ठमे पीएम मोदीक विरुद्ध १७ टा शिकायत दर्ज कयलक।
भाजपा २२ अप्रैलकेँ कांग्रेस नेता राहुल गाँधीक विरुद्ध चुनाव आयोगमे शिकायत दर्ज कयने छल। भाजपा अपन शिकायतमे कहलक जे राहुल गांधी देशमे गरीबी बढ़बाक झूठा दावा कऽ रहल छथि। भाजपाक आरोप अछि जे राहुल गांधी भाषा आ क्षेत्रक आधार पर देशमे विभाजन पैदा करय आ चुनावी माहौल बिगाड़य केर प्रयास कयलनि।
