बिहार विधानसभामे विपक्षके नेता आ महागठबंधन समन्वय समितिक प्रमुख तेजस्वी यादव एक बेर फेरसँ बिहारमे भऽ रहल मतदाता संशोधन पर सवाल उठेलनि अछि। ओ कहलनि जे, आयोग द्वारा जारी विज्ञापन आ सोशल मीडिया पर पोस्टक संबंधमे भ्रम अछि। ओ आरोप लगौलनि जे हुनकर अपन आदेशमे मतभेद अछि।
तेजस्वी कहलनि जे, चुनाव आयोगकेँ आदेश वा अधिसूचना जारी करबाक चाही। महागठबंधनक संयुक्त प्रेस कॉन्फ्रेंसमे ओ चुटकी लैत कहलनि जे आब विज्ञापन आ सोशल मीडिया पोस्ट संवैधानिक संस्थाक नीति वाहक बनि गेल अछि ? तेजस्वी चुनाव आयोग केर वेबसाइट पर आधार कार्डकेँ एखनो एक फॉर्ममे शामिल कयला पर सवाल उठैलनि।
ओ बिहारसँ बाहर काज करय वला लोकक बारेमे सेहो कहलनि जे हुनकर मतदाता संशोधन कोना होएत। की एकमात्र उपाय अछि जे हुनकर नाम मतदाता सूचीसँ हटा देल जाए ? एहेन लोकक संख्या करीब चारि करोड़ अछि। तेजस्वी यादव चुनाव आयोगसँ एहि प्रक्रियाकेँ तत्काल रोकबाक मांग करैत कहलनि जे चुनावक बाद एकरा शुरू करबाक चाही ताकि लोकतंत्रक गरिमा आ जनताक विश्वास अक्षुण्ण रहय। एहि मुद्दाकेँ लऽ कऽ कोर्टक दरवाजा सेहो खटखटाओल गेल अछि।
राज्य कांग्रेस अध्यक्ष राजेश राम सेहो चुनाव आयोगकेँ पूर्ण भ्रममे रखबाक बात कहलनि आ कहलनि जे आयोग कोनो दबावमे निष्पक्ष फैसला नहि लऽ सकैत अछि आ ताहि लेल ओ लगातार आदेश बदलि रहल अछि। ओ पूछलनि जे जखनि 25 जनवरी 2025 केँ मतदाता सूची केर अंतिम रूप देल गेल अछि तखनि आब ओकरा खारिज कियेक करल जा रहल अछि।
राजेश राम कहलनि जे, महागठबंधनक सब घटक 9 जुलाईकेँ ट्रेड यूनियन द्वारा प्रस्तावित भारत बंदक समर्थन कय रहल अछि, पूरा बिहारमे ‘चक्का जाम’ होयत आ राजधानी पटनामे घटक दलक मुख्य नेता सड़क पर उतरताह। कांग्रेस नेता राहुल गांधी सेहो एहि बंदमे भाग लेबय लेल पटना आबि रहल छथि। पटनामे विरोध मार्च निकालल जाएत।
महागठबंधन चुनाव आयोगसँ मांग कयलक अछि जे ओ दैनिक विधानसभावार आंकड़ा सार्वजनिक करथि जाहिसँ मतदाता संशोधनमे पारदर्शिता बनल रहय।
एहि प्रेस कॉन्फ्रेंसमे राजदक संजय यादव, प्रदेश अध्यक्ष मंगनी लाल मंडल, कांग्रेसक प्रदेश अध्यक्ष राजेश राम, बिहार कांग्रेसक प्रदेश प्रभारी कृष्ण अल्लावरू आओर वीआईपी प्रमुख मुकेश सहनी मौजूद छलथि।
