म्यांमारमे शुक्रकेँ आयल 7.7 तीव्रताके विनाशकारी भूकंप आ ओकरा बाद 6.8 तीव्रताक शक्तिशाली झटका सऽ कमसँ कम 20 लोकक मृत्यु भऽ गेल। मृत लोकक संख्या बढ़ि सकैत अछि।
जनतबक अनुसार मांडले शहरमे एकटा मस्जिद खसि पड़ल जाहिमे कतेको लोक मारल गेल छथि। भूकंपक केंद्र सागाइंगक उत्तर-पश्चिममे 10 किलोमीटर गहींरमे छल।
झटका म्यांमार सहित थाईलैंड, पूर्वोत्तर भारत आ चीनक किछु हिस्सामे सेहो महसूस कएल गेल अछि। भूकंप एतबा तीव्र छल जे बैंकॉकमे मेट्रो आ रेल सेवा अस्थायी रूपसँ निलंबित कएल गेल, जाहिसँ निवासीमे व्यापक दहशत पसरि गेल।
थाई प्रधानमंत्री पैतोंगटार्न शिनावात्रा तात्कालिक संकट बैसार बजौलनि आ राजधानीमे आपातकालक स्थिति घोषणा कयल गेल। म्यांमारमे स्थिति गंभीर बनल अछि, विशेष कऽ मांडले क्षेत्रमे इमारतक ढहब आ बुनियादी ढाँचाक नुकसानक समाचार अछि। मांडले आ यांगूनके बीचक सड़ककेँ सेहो भारी नुकसान भेल अछि, जे राहत प्रयासमे बाधा पहुँचा रहल अछि।
प्रभावित क्षेत्रसँ चौंका देबयवाला फुटेजमे खसैत इमारत आ भयभीत लोक सभकेँ सुरक्षित स्थानक लेल भागैत देखल जा रहल अछि।
