असमक किछु हिस्सामे भूकम्पक झटकाक आभास

गुवाहाटी
*

असमक किछु हिस्सामे भूकंपक हल्लुक झटका महसूस कयल गेल। अधिकारीसभ रविदिन कहलनि जे ब्रह्मपुत्रक उत्तरी तट पर असमक उदलगुरी जिलामे भूकम्पक झटका महसूस कयल गेल। रिक्टर स्केल पर भूकम्पक तीव्रता ४.२ मापल गेल।

असमक आपदा प्रबंधन अधिकारी बतौलनि जे राज्यक उदलगुरी जिलामे भूकम्पक झटका महसूस कयल गेल। ई जिला भूटान आ अरुणाचल प्रदेशक सीमासँ सटल अछि।

अधिकारी लोकनि कहलनि जे भूकंपक कारण कोनो हताहत वा सम्पत्तिक क्षतिक सूचना नहिं अछि। राष्ट्रीय भूकम्प विज्ञान केन्द्र (एनसीएस)क अनुसार, भूकंपक केन्द्र उदलगुरीक समीप १५ किलोमीटरक गहराईमे छल।

दर्रांग, सोनितपुर जिला आ लगपासक क्षेत्रमे सेहो भूकम्पक झटका महसूस कयल गेल। भूकंपसँ लोकसभमे दहशत पसरि गेल आ लोक अपन घरसँ बाहर निकलि गेलाह। भूकंपक केन्द्र गुवाहाटीसँ लगभग १०५ किलोमीटर उत्तरमे छल।

आपदा प्रबंधन अधिकारीसभ कहलनि जे पश्चिमी अरुणाचल प्रदेश आ पूर्वी भूटानक किछु क्षेत्रमे भूकम्पक झटका महसूस कयल गेल होयत। मीडिया रिपोर्टक अनुसार, पहाड़ी पूर्वोत्तर क्षेत्रक कमसँ कम एकटा राज्यमे प्रत्येक सप्ताह भूकम्पक अनुभव होइत अछि। अधिकांश भूकम्प रिक्टर पैमाना पर ३ सँ ४ होइत अछि।

ओतहि रविदिन जम्मू-कश्मीरक डोडा जिलामे भूकम्पक झटका महसूस कयल गेल। रिक्टर स्केल पर भूकम्पक तीव्रता ४ नापल गेल छल। राष्ट्रीय भूकम्प विज्ञान केन्द्र कहलक जे जिलामे भोर ६.१४ बजे भूकम्पक झटका महसूस कयल गेल। तीव्रता ४ छल।

एहिसँ पहिने २६ जूनकेँ असमक कार्बी आंगलोंग जिलामे भूकम्प आयल छल। रिक्टर स्केल पर भूकम्पक तीव्रता ३.२ मापल गेल छल।