कांग्रेस अध्यक्ष मल्लिकार्जुन खड़गे रविदिन कहलनि जे, उपराष्ट्रपति जगदीप धनखड़ केर इस्तीफाक पाछुक असली कारणक बारेमे हुनका कोनो जानकारी नहि अछि। ओ कहलनि जे इ मामिला धनखड़ आ प्रधानमंत्री नरेंद्र मोदीक बीचक अछि, ताहि लेल हुनका कहबाक चाही जे वास्तवमे की भेल ?
राज्यसभामे प्रतिपक्षक नेता खड़गे कहलनि जे, धनखड़ सदिखन सरकारक पक्ष लैत छलाह। ओ कहलनि जे, जखनि कखनो विपक्ष मुद्दा उठाबय केर कोशिश करैत छल, चाहे ओ किसानसँ संबंधित होय वा गरीब वा विदेश नीतिसँ संबंधित, ओ कहियो विपक्षकेँ एहेन नहि करय देलनि। खड़गेसँ सवाल पुछला पर कि किसानक पक्षमे बजलाक कारण धनखड़ केर इस्तीफा देबय लेल मजबूर होबय पड़ल, तँ खड़गे कहलनि जे, “हमरा ई सभ नहि बुझल अछि। ओ (धनखड़) सदिखन सरकारक पक्षमे रहलाह। हुनका बताबय केर चाही जे की भेल।”
खड़गे कहलनि जे जखनि हम किसान, गरीब, अंतरराष्ट्रीय मुद्दा वा विदेश नीतिसँ जुड़ल बहुत रास मुद्दा उठेलहुं तँ ओ (राज्यसभामे अध्यक्षक रूपमे) हमरा सबकेँ कहियो मौका नहि देलनि। जखनि हम सब गरीब, महिला, दलित आ वंचित पर अत्याचार आ हिन्दू-मुस्लिम संघर्ष जेहन मुद्दा पर नोटिस दऽ कऽ मुद्दा उठेबाक प्रयास कयलहुं तँ ओ हमरा सबकेँ मौका नहि देलमि। ई (धनखड़केँ उपराष्ट्रपति पदसँ इस्तीफा देबय केर कारण) हुनका आओर मोदीक बीचक मामिला अछि। हमरा सब लग एहि बारेमे कोनो जनतब नहि अछि।
एकर संग-संग खड़गे कर्नाटक कांग्रेस केर अध्यक्षकेँ बदलै केर सवाल पर सेहो जवाब देलनि। ओ कहलनि जे एखनी एहि पर किछु नहि कहि सकैत छी, समय आओत तखनि गप्प करब। फिलहाल उपमुख्यमंत्री डीके शिवकुमार कर्नाटक प्रदेश कांग्रेस समिति (केपीसीसी) केँ अध्यक्षक पद पर विस्तारित कार्यकालक लेल छथि। राज्यमे सत्ताधारी कांग्रेसक भीतर हुनक जगह लेबय केर आवाज उठि रहल अछि, किएक तँ ओ दूटा महत्वपूर्ण पद पर छथि।
जनतब अछि जे 21 जुलाईकेँ साँझमे जगदीप धनखर उपराष्ट्रपति पदसँ इस्तीफा दऽ देलनि। ओ अपन इस्तीफाक पाछु स्वास्थ्य कारण बतेलनि। हुनक अचानक एही कदमसँ राजनीतिक गलियारामे चर्चा तेज भऽ गेल अछि।
