एकटा पैघ सफलतामे सुरक्षा बल नेपालक सीमावर्ती मधुबनी जिलाक माधवापुर क्षेत्रमे 46,97,160 रुपया केर नगद सहित दू टा संदिग्ध केर गिरफ्तार केलक अछि। ई कारवाई 48वीं बटालियन सशस्त्र सीमा बल (एसएसबी), जयनगर केर ‘एफ’ संवाय आ बिहार पुलिस केर संयुक्त विशेष अभियानक तहत कयल गेल। गुप्त सूचना आधारित एहि अभियानक नेतृत्व डिप्टी कमांडेंट विवेक ओझा कयने छलाह । जब्त कयल गेल भारी नगदीक साथ-साथ दू मोबाइल फोन बरामद कयल गेल छल, जकर गहन जांच कयल जा रहल अछि। जब्त राशि, मोबाइल फोन आ दुनू आरोपीकेँ कानूनी कारवाईके लेल माधवपुर थानामे सौंपल गेल अछि। आगूक जांचमे आयकर विभाग वा प्रवर्तन निदेशालय जेहन एजेंसी सेहो शामिल भs सकैत अछि।
ई कारवाई सीमा स्तंभ संख्या 295/5 सँ भारतीय सीमाक भीतर लगभग 600 मीटर दूर माधवपुर थाना क्षेत्रमे कयल गेल छल। जवान गुप्त सूचनाक आधार पर तलाशी अभियान चलाबैत दू गोटे केर संदिग्ध अवस्थामे पकड़ल गेल। अधिकारीक कहब अछि जे एतेक पैघ राशिक संबंधमे प्रारंभिक जांच भs रहल अछि। संगहि मोबाइल फोन केर फोरेंसिक जांचक लेल भेजल जा सकैत अछि, जाहिसँ इ पता लगाओल जा सकए जे एहि रुपयाक उपयोग कोन काज लेल भs रहल छल आ इ हवालासँ जुड़ल अछि वा सीमा पारक गैरकानूनी गतिविधिसँ जुड़ल अछि।
