‘डोनेट फॉर देश’ नामसँ कांग्रेस कयलक ऑनलाइन क्राउडफंडिंग अभियानक घोषणा

नई दिल्ली

*

कांग्रेस शनिदिन १८ दिसंबरसँ ‘डोनेट फॉर देश’ नामसँ ऑनलाइन क्राउडफंडिंग अभियान शुरू करबाक घोषणा कयलक आ कहलक जे ई पहल १९२०-२१ मे महात्मा गाँधीक ऐतिहासिक ‘तिलक स्वराज कोष’सँ प्रेरित अछि।

 

एकटा संवाददाता सम्मेलनकेँ सम्बोधित करैत कांग्रेसक महासचिव (संगठन) के सी वेणुगोपाल कहलनि: “आइ हम ‘डोनेट फॉर देश’ नामसँ ऑनलाइन क्राउडफंडिंग कार्यक्रमक घोषणा कऽ रहल छी। ई पहल १९२०-२१ मे महात्मा गाँधीक ऐतिहासिक ‘तिलक स्वराज फंडसँ प्रेरित अछि आ एकर उद्देश्य समान संसाधन वितरण आ अवसरसँ समृद्ध भारतक निर्माणमे हमर पार्टीकेँ सशक्त बनायब अछि।”

 

आगू ओ कहलनि “हमर उद्घाटन अभियान ‘बेहतर भारतक लेल दान’ भारतीय राष्ट्रीय कांग्रेसक १३८ सालक यात्राक उत्सव मनबैत अछि।”

 

वेणुगोपाल कहलनि “अपन इतिहासकेँ गला लगबैत हम समर्थकसभकेँ १३८ या १३८० रुपैया या १३,८०० रुपैया या ओहिसँ बेसी गुणकमे दान करबाक लेल आमंत्रित करैत छी, जे बेहतर भारतक लेल पार्टीक स्थायी प्रतिबद्धताक प्रतीक अछि। ”

 

ओ कहलनि जे एहि ऑनलाइन क्राउडफंडिंगक लेल दूटा चैनल बनाओल गेल अछि।

वेणुगोपाल कहलनि जे एहि अभियानक आधिकारिक शुभारम्भ कांग्रेस अध्यक्ष द्वारा १८ दिसम्बरकेँ नई दिल्लीमे कयल जायत, संगहि डोनेट लिंक सेहो लाइव होयत।

ओ कहलनि “हम सभ राज्य इकाई प्रमुखसभसँ प्रेस कॉन्फ्रेंस आ सोशल मीडियाक माध्यमसँ जागरूकता बढ़यबाक आह्वान करैत छी। ई अभियान मुख्य रूपसँ २८ दिसंबर, स्थापना दिवस धरि ऑनलाइन रहत, जकर बाद हम जमीनी स्तर पर अभियान शुरू करब, जाहिमे स्वयंसेवक द्वारा घर-घर जायब, प्रत्येक बूथमे कमसँ कम दस घरकेँ लक्षित करब आ प्रत्येक घरसँ कमसँ कम १३८ टाकाक योगदान शामिल अछि।”

 

ओ इहो कहलनि “हम अपन राज्य स्तरीय पदाधिकारी, अपन निर्वाचित प्रतिनिधि, डीसीसी अध्यक्ष, पीसीसी अध्यक्ष आ एआईसीसी पदाधिकारी सभकेँ कमसँ कम १३८० रुपैया देबाक लेल प्रोत्साहित करैत छी।”

वेणुगोपाल कहलनि “अभियानक प्रभावशीलताक लेल सभ प्रदेश अध्यक्षसभकेँ पार्टीक शुभचिंतक आ पदाधिकारी सभक बीच संभावित दान-दाताक पहचान करय केर चाही, जिनकर लक्ष्य 1,380 या 13,800 रुपैया के योगदान करय के अछि। ई रणनीतिक दृष्टिकोण एकटा बेहतर भारतक लेल हमर दृष्टिकोणक सफलता सुनिश्चित करत। ”

वेणुगोपाल इहो कहलनि जे पार्टी अपन स्थापना दिवस पर २८ दिसम्बरकेँ नागपुरमे एकटा विशाल रैली करय जा रहल अछि। काल्हि नागपुरमे हमर विस्तृत बैसार अछि आ एहि विशाल आयोजनमे कमसँ कम १० लाख कार्यकर्ता भाग लेताह। एहि रैलीमे पूरा भारतक नेता भाग लेताह।”

 

एम्हर कांग्रेसक कोषाध्यक्ष अजय माकन कहलनि जे, जे दान करय चाहैत छथि ओ भारतीय नागरिक होयबाक चाही आ हुनकर आयु १८ सालसँ बेसी होयबाक चाही।

माकन कहलखिन कि दानदाता के दान प्रमाण पत्र सेहो भेटत।