प्रधानमंत्री नरेन्द्र मोदी बुधदिन कहलनि जे डीएमके तमिलनाडुकेँ नहिं मात्र पुरान सोच आ पुरान राजनीतिमे जकड़ि कऽ रखलक अछि अपितु ‘बांटू आ राज करू’क अपन एजेण्डाकेँ सेहो पूरा शक्तिसँ आगू बढ़ा रहल अछि।
वेल्लोर फोर्ट मैदानसँ वेल्लोर, कृष्णागिरी, धर्मपुरी, अरणी, अरक्कोणम आ तिरुवन्नामलाई लोकसभा सीटक भाजपा उम्मीदवारक समर्थनमे एकटा विशाल रैलीकेँ सम्बोधित करैत पीएम मोदी डीएमके पर भ्रष्टाचारमे शामिल हेबाक आरोप सेहो लगओलनि।
डीएमकेक राजनीतिपर दुख व्यक्त करैत ओ कहलनि: “डीएमके पारिवारिक राजनीति, भ्रष्टाचार आ तमिल विरोधी संस्कृतिक आधार पर चुनाव लड़ैत अछि। ओ कहलनि जे डीएमके परिवार तमिलनाडुक युवासभकेँ अस्थिर कऽ देलक अछि आ व्यवस्थित लूटकेँ बढ़ावा देलक अछि, जाहिसँ तमिलनाडुकेँ विकाससँ वंचित कयल गेल अछि। भ्रष्टाचार डीएमकेक कॉपीराइट अछि।
प्रधानमंत्री डीएमकेक राजनीति पर हमला करैत कहलनि जे पार्टी नव संसद भवनमे ‘पवित्र सेंगोल’क स्थापनाक सेहो बहिष्कार कयने छल, जे भारतक स्वतंत्रताक संस्थापक प्रतीक अछि। ओ कहलनि, “हमर प्रयास सदैव तमिल संस्कृतिकेँ बढ़ावा देबाक रहल अछि, चाहे ओ काशी-तमिल संगम होय, सौराष्ट्र-तमिल संगम होय वा संयुक्त राष्ट्रमे तमिल बजनाइ होय।”
प्रधानमंत्री अपन संबोधनमे स्पष्ट कयलनि जे २१म शताब्दी ‘विकसित भारत’ आ ‘विकसित तमिलनाडु’क लेल बहुत महत्वपूर्ण अछि। “एकरा सक्षम करबाक लेल हमर सरकार पछिला १० सालमे अभूतपूर्व विकासक आधारशिला रखलक अछि। कमजोर अर्थव्यवस्था आ बहुत रास घोटालाक बीच हम सभ पैघ आ साहसिक निर्णय लेने छी। आइ जखन भारत सभ क्षेत्रमे सर्वोच्च सफलता प्राप्त कऽ रहल अछि तखन ओ तमिलनाडुक लोकक मेहनत, प्रतिभा आ क्षमतासँ उत्सुक अछि।”
प्रधानमंत्री “कच्चातिवु द्वीपक दुर्भाग्यपूर्ण उपेक्षा दिसि सेहो इशारा कयलनि आ कांग्रेस-डीएमके नीतिपर तमिलनाडुमे मछुआरासभक जीवन लगातार खतरामे डालबाक आरोप लगओलनि।
ओ कहलनि, “कच्चातिवु द्वीपक उपेक्षा कांग्रेसक एकटा भूल छल, जाहिसँ तमिलनाडुमे मछुआरासभक जीवन सदाक लेल खतरामे पड़ि गेल।” ओ कहलनि जे हुनकर सरकार भारतीय मछुआरासभकेँ वापिस अनलक।
तमिलनाडुक जनताक लेल ‘शक्ति’क महत्वपर जोर दैत मोदी कहलनि जे ‘इंडिया’ गठबंधनक उद्देश्य तमिलनाडुक जनताक प्रिय ‘शक्ति’केँ नष्ट करब अछि।
राज्य पर केंद्र सरकारक ध्यान केन्द्रित करैत प्रधानमंत्री कहलनि जे ओ तमिलनाडुमे रक्षा गलियाराकेँ आगू बढ़ा रहल अछि जे राज्यक चेहरा बदलि देत। तमिलनाडुसँ अन्तरिक्ष क्षेत्रमे बहुत रास स्टार्ट-अप सेहो अछि जे देशक अन्तरिक्ष यात्रामे सहायता कयलक अछि।
एहिसँ पहिने वेल्लोरक जनता प्रधानमंत्रीक जोरदार स्वागत कयलक। पीएम कहलनि “हम वेल्लोरक इतिहास, पौराणिक कथा आ बहादुरीकेँ नमन करैत छी। वेल्लोर अङ्ग्रेजक विरुद्ध एकटा महत्वपूर्ण क्रांति कयलक, आ वर्तमानमे एन.डी.ए.क लेल ओकर प्रबल समर्थन ‘फिर एक बार मोदी सरकार’क भावनाकेँ देखबैत अछि।”
ओ भाजपा उम्मीदवार ए.सी. षणमुगम (वेल्लोर), सौम्या अंबुमणि (धर्मपुरी), बालू (अराक्कोणम), सी.आर. नरसिम्हन (कृष्णागिरी), असुवथमन (तिरुवन्नामलाई), ए. गणेश कुमार (अरानी)क परिचय सेहो करेलनि आ लोकसभसँ हुनका वोट देबाक अपील कयलनि।
