विश्व जल दिवस तथा बिहार दिवसक अवसर पर आई शनिकेँ 22 मार्च, 2025 केँ उग्राद्या भवन, बेहटा टोला, बनगाँव, सहरसा मे ‘धर्ममूला नदी संरक्षण अभियान’क सुचारू संचालन हेतु ग्रामीण सभक द्वारा कार्य/संचालन समितिक गठनक सर्वसम्मति सौं अनुमोदित कयल गेल।
अभियानक संरक्षक पं. हरिश्चंद्र मिश्र जीक अध्यक्षतामे आयोजित बैठकमे अभियानक शुभारम्भक अवसर पर पारित प्रस्ताव सभ एवं लेल गेल निर्णय सभकें सर्व सम्मतिसँ अनुमोदित कयल गेल तथा नव प्रस्ताव सभ पर विचार कय निर्णय लेल गेल ।
ज्ञातव्य जे प्राचीन, पौराणिक एवं पवित्र धर्ममूला (धेमुरा) नदीक संरक्षण एवं पुनरुद्धारक निमित्त गत रविकेँ (16 मार्च ) गोरहो, बनगाँवमे धर्ममूला नदीक तट स्थित रामघाट पर ‘धर्ममूला नदी संरक्षण अभियान’क शुभारम्भ कयल गेल छल । ओहि अवसर पर सर्व सम्मतिसँ गठित एवं घोषित कार्य/ संचालन समितिमे पं. हरिश्चंद्र मिश्र (संरक्षक), शशिधर ठाकुर (अध्यक्ष), रूपा देवी (उपाध्यक्ष), डॉ. विनय कर्ण ( संयोजक / सचिव), डॉ. गणेश ‘जनगण’ (संयुक्त सचिव), प्रो. अरुण कुमार खाँ (समन्वयक), विश्वनाथ खाँ, विशेश्वर मुखिया, अरविन्द खाँ, निर्मल मिश्र ‘नेता जी’, शिशिर कुमार झा, धनञ्जय कुमार खाँ आदिक नाम शामिल कयल गेल अछि एवं ताहि प्रस्तावक सर्व सम्मतिसौं आई अनुमोदित कयल गेल।
समारोहक आरम्भमे धर्ममूला नदी संरक्षणक व्यापक विमर्शक विषय बनेबाक लेल अपन प्रतिष्ठित मैथिली समाचार पत्र ‘मैथिल पुनर्जागरण प्रकाश’*क प्रति धन्यवाद ज्ञापित करैत धर्ममूला संरक्षण अभियानक नव गठित संचालन समिति द्वारा आभार व्यक्त कयल गेल।
आजुक समारोहमे प्रस्ताव पारित कय सर्व सम्मतिसँ निर्णय लेल गेल जे धर्ममूला नदीकेँ जलकुम्भी, प्रदुषण एवं अतिक्रमण सौं मुक्त करेबाक लेल जल संसाधन विभागकेँ प्रतिवेदन प्रेषित कयल जाए। संगहि, गोरहो घाटसँ राम घाट धरि नियमित साफ-सफाई करय केर व्यवस्था होय।
एहि अवसर पर इहो निर्णय लेल गेल जे धर्ममूला नदीक प्राचीनता, पौराणिकता एवं ऐतिहासिकताकेँ सिद्ध करबाक वास्ते विद्वान, बुद्धिजीवी एवं मीडिया कर्मी सभसौं सहयोग लेल जाए। संगहि, धर्ममूला विषय केंद्रित आलेखक संकलन एवं संगोष्ठी, परिचर्चा आदिक आयोजन कयल जाए ताकि एहि विषयमे जन – जगारूकतामे अपेक्षित वृद्धि भ’ सकय। एकर अलावे पत्र, प्रतिवेदन, प्रतिनिधिमण्डल एवं मीडियाक माध्यमसँ विषयक गंभीरताक दिशि सरकारक ध्यान सेहो आकृष्ट कयल जाए।
समारोहक अंतमे अभियानक संयोजक डॉ. विनय कर्ण धर्ममूला संरक्षण अभियानक सफलताक कामनाक संग सभ आगत सदस्य लोकनिकें एवं समितिक पदाधिकारीगणकें धन्यवाद ज्ञापित करैत जल, नदी एवं पर्यावरण संरक्षणसौं जुड़ल सब गोटयकें आजुक विशिष्ट दिवस ‘विश्व जल दिवस’ एवं ‘बिहार दिवस’क अवसर पर हार्दिक शुभकामना देलन्हि।
