मधुबनीक पिपरौन-जटही अंतरराष्ट्रीय सीमा पर 48म एसएसबी बटालियन दू टा चीनी नागरिककेँ गिरफ्तार कयलक अछि। दुनू गोटे बिना अनुमतिक भारतीय सीमामे प्रवेश कs रहल छल। सिपाही सब ओकरा सबकेँ पिलर नंबर 284/35 लग पकड़ि लेलक।
गिरफ्तार व्यक्तिक नाम वू हेलोंग अछि, जेकर उम्र ३८ साल अछि। ओ चीनक लिओनिंग प्रांतक डालियान शहरक निवासी अछि। ओकर पासपोर्ट नंबर EL9961400 आ पिताक नाम शेन जहोंग मिंग अछि।
अनुसन्धानसँ पता चलल अछि जे वु हेलोंग १४ मार्चकेँ पर्यटन वीजासँ नेपालक काठमांडू पहुँचल छल । हिनक वीजा ११ जून २०२५ धरि वैध अछि, जे ११ जुलाई २०२५ धरि बढ़ाओल गेल अछि ।काठमांडू आ पोखरा घुमलाक बाद २६ मईकेँ जनकपुर पहुँचलाह आ “मिथिला चिरायु” होटलमे रुकल छलाह । पूछताछक दौरान वू हेलोंग कहलनि जे, ओ पहिने चीनमे रेस्टोरेंट चलाबैत छलाह, मुदा दू साल पहिने ओ रेस्टोरेंट बंद भs गेल छल। आब ओ सोशल मीडिया पर वीडियो बना कs काज कs रहल छथि। एकरा लेल ओ अलीबाबासँ 10 हजार युवान (चीनी मुद्रा) लेलक अछि। ओ टिकटोक आ वीचैट सन प्लेटफॉर्म पर वीडियो बना कs अपलोड करैत छथि। दोसर व्यक्तिक नाम शेंग जून योंग अछि। ओ 27 फरवरीकेँ शंघाईसँ नेपाल आयल छल। हुनका लग टूरिस्ट वीजा छल, जे 27 मई 2025 तक वैध छल, जे आब 26 जून 2025 तक बढ़ा देल गेल अछि। ओ मार्च 2024 सँ मई 2024 धरि नेपालमे रहि चुकल छथि। एहि बेर ओ अपन प्रेमिकासँ भेंट करय लेल नेपाल आयल छलाह।
जांचक दौरान वू हेलोंगक मोबाइलसँ 50 सँ अधिक भारत विरोधी आ खालिस्तान समर्थक वीडियो भेटल, जेकरा वू 7 मई केर बाद इंटरनेटसँ डाउनलोड कs चुकल छल। मुदा एखनि धरि ई साबित नहि भs सकल कि ओ ई वीडियो केर सोशल मीडिया पर अपलोड केलक। वू कहलक कि भविष्यमे ई वीडियो पोस्ट कs कs अपन व्यू आ फॉलोअर्स बढ़ाबय चाहैत छलौंह।
चीन केर दुनु नागरिककेँ आगूक कानूनी कारवाईक लेल हरलाखी थानामे सौंपल जायत। एसएसबी कमांडेंट गोविन्द सिंह भण्डारी अपन टीम भारत-नेपाल सीमा पर पूर्ण सतर्कताक संग निगरानी कय रहल आ जवान सब सतर्क रहल बतौलनि।
एहि घटनाक बाद सीमा पर सुरक्षा उपाय तेज कएल गेल अछि। अधिकारि सब हाई अलर्ट पर छथि आ ई सुनिश्चित कs रहल छथि जे कोनो तरहक अनाधिकृत गतिविधि नहि होय। बिना उचित मंजूरीक ड्रोनक उपयोग पर सख्त रोक अछि, खास कs अंतरराष्ट्रीय सीमा केर नजदीकक इलाकामे। चीन केर दूनू नागरिक लग वीडियोग्राफीमे इस्तेमाल कयल जाय वाला उपकरण भेटल, जाहिसँ ओकर गतिविधि पर संदेह बढ़ि गेल। जांचकर्ता ओकर उपकरणक जांच कऽ रहल छथि ताकि कोनो भी रिकॉर्ड कैल गेल फुटेज या डाटा मिलि सकय जाहिसँ ओकर उद्देश्यक बारेमे जानकारी भेटि सकय।
स्थानीय निवासी सभ कहलनि जे, देर राति ड्रोन देखलनि, तकर बाद ओ सभ अधिकारीकेँ जानकारी देलनि। संबंधित अधिकारी द्वारा मामिलाकेँ संज्ञानमे लैत आ संदिग्धकेँ गिरफ्तार कs ओकर उपकरण जब्त कs लेल गेल। संगहि स्थानीय जनता केर मांग अछि जे राष्ट्रीय सुरक्षा केर देखैत ई सुनिश्चित कएल जाए जे ई घटना फेरसँ नहि होए, एहि घटनासँ संभावित अंतर्राष्ट्रीय षड्यंत्र पर सवाल उठी रहल अछि, कियेककि संवेदनशील सीमा क्षेत्रक समीप विदेशी नागरिक शामिल अछि। भारत आ नेपालक बीच संबंध बिगाड़बाक कोशिश कयल जेबाक सेहो जांच भs रहल अछि।
