जदयू केर वरिष्ठ नेता आ सांसद देवेश चंद्र ठाकुर बिहारमे विपक्षक नेता तेजस्वी यादवक बयान जे मुख्यमंत्री नीतीश कुमारक लेल राजदक दरवाजा बंद अछि पर प्रतिक्रिया देलनि।
जदयू सांसद देवेश चन्द्र ठाकुर मंगल दिन विभिन्न मुद्दा पर संवाददातासँ बातचीत कयलथि। मुख्यमंत्री नीतीश कुमारक दिल्ली यात्रा पर ठाकुर कहलनि जे मुख्यमंत्रीक यात्रामे कोनो राजनीतिक मुद्दा नहि अछि।
बिहार लोक सेवा आयोगक परीक्षा रद्द करय केर मुद्दा पर पूछल गेल सवालक जवाबमे ओ कहलनि, “निश्चित रूपसँ सरकार संज्ञान लेलक अछि। मुख्य सचिव स्वयं अभ्यर्थी सभसँ गप्प कयलनि। सरकारमे हुनकासँ पैघ कोनो पदाधिकारी नहि अछि। आब हमरा इंतजार करए पड़त, निश्चित रूपसँ एकटा रास्ता निकलत।”
जन सुराजक संस्थापक प्रशांत किशोर द्वारा बीपीएससी केर अभ्यर्थीक मांग पूरा नहि भेला पर २ जनवरीसँ धरना पर बैसबाक धमकी पर पूछल गेल सवालक जवाबमे देवेश चंद्र ठाकुर ठाकुर कहलनि, “हुनका जे करय केर अछि से करैथ, कोनो टिप्पणी नहिं, सरकार अपन काज कए रहल अछि।”
पूर्व उपमुख्यमंत्री तेजस्वी यादवक एहि बयान पर जे नीतीश कुमारक लेल राजदक दरवाजा बंद अछि, ओ कहलनि कि राष्ट्रीय जनता दलक लेल सेहो जदयू केर दरबज्जा बंद अछि।
एहिसँ पहिने नेता प्रतिपक्ष तेजस्वी यादव नीतीश कुमारक महागठबंधनमे शामिल होयबाक सम्भावनाकेँ समाप्त कऽ देलनि। तेजस्वी कहलनि जे नीतीश कुमार लेल राजद आ महागठबंधनक दरवाजा पूर्णतः बंद अछि। ओ कहलनि जे मुख्यमंत्रीक सङ्ग सरकार चलायब “अपन पैर पर कुरहरि मारब” जकाँ होयत। नीतीश सरकार पर कटाक्ष करैत ओ कहलनि जे सरकार मात्र नीतीशक चेहरा पर चलि रहल अछि, जखन कि वास्तवमे थाकल आ सेवानिवृत्त अधिकारी एकरा चला रहल छथि।
