दिल्ली विधानसभा चुनावमे विशाल जीतक बाद भाजपा बिहार पर ध्यान केंद्रित कऽ रहल अछि, जतय अक्टूबर-नवम्बरमे चुनाव होयबाक आशा अछि। भाजपाक नेतृत्ववला राष्ट्रीय जनतांत्रिक गठबंधन (एनडीए) 243 सदस्यीय विधानसभामे 225सँ बेसी सीट जीतबाक लक्ष्य रखलक अछि।
भाजपाक वरिष्ठ विधायक आ बिहारक पूर्व उपमुख्यमंत्री तारकिशोर प्रसाद कहलनि जे राज्यमे एनडीए सत्ता बरकरार रखत। ओ कहलनि, “एनडीए सरकार बिहारमे प्रभावी ढंगसँ काज कऽ रहल अछि। 2025मे एनडीए सत्तामे वापस आबि बिहारक विकास जारी रखत।”
केन्द्रीय मंत्री, आ हिन्दुस्तानी अवाम मोर्चा (हम)क नेता जीतन राम मांझी, जे राजगक प्रमुख सहयोगी छथि, दिल्ली चुनावकेँ बिहारमे की अपेक्षा कयल जाय ओकर पूर्वावलोकन बतौलनि। मांझी ट्वीट कहलनि “दिल्ली तऽ झांकी अछि, बिहार एखनि बाकी अछि… जय एनडीए।”
दोसर दिसि, राष्ट्रीय जनता दल (राजद) भाजपाक दावाकेँ खारिज करैत कहलक अछि जे दिल्लीक परिणामक बिहार चुनाव पर कोनो प्रभाव नहि पड़त। पार्टीक प्रवक्ता मृत्युंजय तिवारी झारखण्डक परिणामकेँ एकटा मिसालक रूपमे देखबैत कहलनि जे बिहार परिवर्तनक लेल मतदान करत। ओ कहलनि “बिहारक लोक परिवर्तनक लेल वोट करत। झारखण्डक परिणामक प्रभाव एतय पड़त। दिल्ली चुनावसँ बिहार पर कोनो असरि नहि पड़त।”
लोकसभा चुनावसँ पहिने मुख्यमंत्री नीतीश कुमार विपक्षी गठबन्धन छोड़ि एनडीए ब्लॉकमे फेरसँ शामिल भऽ गेल छथि। ई गठबंधन बिहारक ४० लोकसभा सीटमेसँ ३० सीट जीतलक। भाजपा नेताक मानब छनि जे कुमारक एनडीएमे वापसी आ दिल्ली चुनावक परिणाम बिहारमे हुनक स्थिति मजबूत करत।
यक्ष प्रश्न, कि वित्त मंत्री निर्मला सीतारमण’क बिहारक लेल बजटक बोनान्जासँ बनल गति पर चलि सकैत अछि ? आ एहीसँ एनडीए केर नैया पार होयत ?
