पछिला सप्ताह दिल्लीमे पेयजलक संकट बढ़ि गेल। एतय राष्ट्रीय राजधानीमे पेयजलक उत्पादनमे सामान्य दिनक तुलनामे १०० एमजीडीसँ बेसी कमी आयल अछि। एम्हर दिल्लीक मंत्री आतिशीक राज्यक लेल पानिक माँगमे अनशन रविदिन तेसर दिनमे प्रवेश कयलक।
आतिशी आइ कहलनि जे हरियाणाक हथनी कुण्ड पानिसँ भरल अछि मुदा ओतय केर सरकार दिल्लीकेँ पानि छोड़बाक द्वार बन्द कऽ देलक अछि। हरियाणा सरकार दिल्लीक अधिकारक पानिकेँ ताला लगा देलक अछि।
आतिशी कहैत छथि जे हुनकर ‘जल सत्याग्रह’ ताबत धरि चलैत रहत जाबत धरि दिल्लीक लोककेँ उचित पानि नहि भेटत।
दोसर दिस, दिल्लीक मंत्री सौरभ भारद्वाज कहलनि जे दिल्लीक पेयजल उत्पादनमे आब ११७ एमजीडीक कमी आयल अछि। ओ आरोप लगओलनि जे आतिशी अनशन पर बैसलाक बाद हरियाणा बेसी पानि रोकय लागल अछि। एहिसँ प्रतिदिन लगभग १७ एमजीडी पानिमे अतिरिक्त कमी आयल अछि। भारद्वाज कहलनि जे एक एमजीडी पानि लगभग २८,५०० लोकक पानिक आवश्यकताकेँ पूरा करैत अछि। ओ कहलनि जे दिल्लीमे पहिने १०० एमजीडी पानिक कमीक सामना करय पड़ि रहल छल। आब ११७ एमजीडी पानिक कमी अछि। अतिरिक्त १७ एमजीडी पानि दिल्लीक लगभग ४.८५ लाख लोकक आवश्यकताकेँ पूरा करैत अछि।
ओ आरोप लगओलनि जे लोकसभा चुनावक परिणामक बादसँ दिल्लीकेँ लगातार कम पानि देल जा रहल अछि। एहिसँ पहिने दिल्लीमे प्रतिदिन लगभग १००० एमजीडी पानिक उत्पादन होइत छल। २१ जूनकेँ ई घटि कऽ ८९६ एमजीडी रहि गेल अछि।
दिल्ली सरकार आरोप लगओलक जे हरियाणासँ आबयवला पानि लगातार घटि रहल अछि। ओ एहि मुद्दा पर केंद्र सरकार पर सेहो हमला करैत कहलनि जे जे ‘वन इंडिया वन टीम’क बात करैत छथि ओ आइ अपन राजधानीक लोककेँ पियासल राखि रहल छथि।
दिल्लीक मंत्री लोकनि जल संकटक मुद्दा पर उपराज्यपालसँ भेंट करत। सौरभ भारद्वाज कहलनि, “पहिने हम आ आतिशी पानिक मुद्दा पर उपराज्यपालसँ भेंट कयने छलहुँ। ई बैसार उपराज्यपाल द्वारा तीन कैमरामे रिकॉर्ड कयल गेल छल।
