दिल्लीक मुख्यमंत्री अरविन्द केजरीवालकेँ बृहस्पतिकेँ राउज एवेन्यू अदालत जमानत दऽ देने छल, मुदा शुक्रदिन उच्च न्यायालय हुनक रिहाई पर रोक लगा देलक। ओ शराब घोटालासँ जुड़ल धनशोधनक मामिलामे जेलमे छथि।
प्रवर्तन निदेशालय (ईडी) शुक्रदिन शराब घोटालासँ जुड़ल धनशोधनक मामिलामे निचली अदालतक जमानत आदेशकेँ चुनौती दैत उच्च न्यायालयक दरवाजा खटखटेलक।
ईडी केर तरफसँ अतिरिक्त सॉलिसिटर जनरल (एएसजी) एसवी राजू न्यायमूर्ति सुधीर कुमार जैन आ न्यायमूर्ति रविन्द्र डुडेजा केर अवकाशकालीन पीठमे याचिका दायर कयलनि। सुनवाई केर बाद उच्च न्यायालय रिहाई पर रोक लगा देलक।
एएसजी राजू कहलखिन, “हम तत्काल रोक लगाबय केर मांग कए रहल छी। आदेश भोर ८ बजे सुनायल गेल। आदेश अपलोड नहिं कएल गेल अछि। निचला अदालतमे हमर याचिका पर सुनवाई नहिं भेल।”
सीएम केजरीवालक प्रतिनिधित्व करैत वरिष्ठ अधिवक्ता अभिषेक मनु सिंघवी स्थगनक माँगक विरोध कयलनि। सिंघवी कहलनि, “सुप्रीम कोर्टक दस फैसला अछि जे जमानत रद्द करब जमानत देबयसँ एकदम अलग होइत अछि।” दुनू पक्षक दलील सुनलाक बाद उच्च न्यायालय निर्देश देलक जे जाबत धरि मामिलाक पूर्ण सुनवाई नहिं भऽ जायत ताबत धरि जमानत आदेशकेँ लागू नहिं कयल जायत।
लोकसभा चुनावक दौरान केजरीवालकेँ २१ दिनक लेल जमानत देल गेल छल। चुनाव समाप्त होइत हुनका २ जूनकेँ फेरसँ जेल भेज देल गेलनि।
एहिसँ पहिने बृहस्पति साँझ आदेश सुनायबाक समय ईडी जमानत बाण्ड पर हस्ताक्षरकेँ ४८ घंटाक लेल स्थगित करबाक माँग कयलक जाहिसँ आदेशकेँ उच्च न्यायालयमे चुनौती देल जा सकय। अदालत ईडीक अनुरोध खारिज करैत ईडीक आदेशपर रोक लगाबयसँ मना कऽ देलक।
अदालत केजरीवालकेँ एक लाख टाकाक निजी मुचलका पर जमानत देने छल। एकर बाद ईडी शुक्रदिन भोरे दिल्ली उच्च न्यायालय पहुँचल।
