दिल्लीक मुख्यमंत्री रेखा गुप्ता शनिदिन प्रधानमंत्री नरेन्द्र मोदीसँ हुनक निवास पर भेंट कयलनि आ दोसर दिसि हुनकर कैबिनेटक मंत्री सभ गड्ढासँ भरल सड़कक मरम्मत आ शहरभरिमे लम्बित परियोजनासभक जाँच करबाक लेल सड़कपर उतरलाह।
दिल्लीमे सत्ता सम्हारलाक बाद रेखा गुप्ताक पीएम मोदीक संग ई पहिल बैसार छल। एहि दौरान ई दुनू नेता दिल्लीक विकासपर चर्चा कयलनि। प्रधानमंत्री मोदीक संग बैसारक क्रममे सीएम गुप्ता “दिल्लीक बेटी”केँ लोकक सेवा करबाक अवसर देबाक लेल धन्यवाद देलनि।
प्रधानमंत्री निवास लेल प्रस्थान करबासँ पहिने सीएम गुप्ता भोरमे शालीमार बागमे अपन घरक पहिल मंजिलक बालकनीसँ अपन शुभचिंतकसभक अभिवादन कयलनि। गुप्ता घोषणा कयलनि जे ओ शहरक सेवा लेल “दिल्लीक बेटी”केँ चुनबाक लेल शहरक सभ महिला आ बेटी सभक तरफसँ आभार व्यक्त करबाक लेल प्रधानमंत्री मोदीसँ भेंट करतीह। ओ अपन संबोधनक समापन “जय श्री राम” आ “भारत माता की जय”क नाराक संग कयलनि।
बादमे, मुख्यमंत्री बुनियादी ढाँचामे सुधार, दिल्लीमे खोदल गेल सड़क, क्षतिग्रस्त सड़क आ यातायातसँ जुड़ल मुद्दा पर चर्चा करबाक लेल लोक निर्माण विभागक अधिकारीसभक संग बैसार कयलनि आ सुधारक निर्देश जारी कयलनि।
लोक निर्माण मंत्री प्रवेश वर्मा बारापुला चरण-३ परियोजनाक निरीक्षण कयलनि। दक्षिण-पूर्वी दिल्लीमे सराय काले खान लग संवाददाता सभसँ बातचीत करैत वर्मा कहलनि जे ओ दिल्लीक सड़कपर अतिक्रमण हटयबाक सख्त निर्देश सेहो जारी कयलनि अछि।
