दिल्लीक मुख्यमंत्री अरविन्द केजरीवाल दिल्ली शराब नीति घोटाला मामिलामे ईडीक समक्ष उपस्थित होयबाक लेल सहमत भऽ गेल छथि। ओ कहलनि जे १२ मार्चक बाद हुनका कोनो तिथि देल जेबाक चाही।
दिल्लीक मुख्यमंत्री अरविन्द केजरीवाल दिल्ली शराब नीति घोटाला मामलामे पूछताछ करबाक लेल सहमत भऽ गेल छथि। ओ प्रवर्तन निदेशालयसँ १२ मार्चक बाद पूछताछक तारीख देबाक लेल कहलनि अछि। केजरीवालक ई प्रतिक्रिया, एहेन समयमे आयल जखनि प्रवर्तन निदेशालय द्वारा शराब घोटाला मामिलामे २७ फरवरीकेँ हुनका सम्मन जारी कयलाक बाद आयल अछि जाहिमे हुनका ४ मार्चसँ पहिने पूछताछमे शामिल होयबाक लेल कहल गेल छल।
आम आदमी पार्टीक सूत्र कहलनि जे सीएम केजरीवाल ईडीक सभ प्रश्नक उत्तर देबाक लेल तैयार छथि। मुदा, ई सम्मन अवैध अछि, एकर बावजूद केजरीवाल सभ प्रश्नक उत्तर देबाक लेल तैयार छथि। “मुख्यमंत्री १२ मार्चक बाद तारीख मांगने छथि। ओ वीडियो कॉन्फ्रेंसिंग केर माध्यमसँ पूछताछक लेल उपस्थित हेताह।
केजरीवालकेँ पहिने २१ फरवरीकेँ केन्द्रीय जांच एजेंसी द्वारा पूछताछ लेल सातम सम्मन जारी कयल गेल छल मुदा ओ एकरा अनदेखा कऽ देलनि।
जांच एजेंसी पहिने ३१ जनवरीकेँ केजरीवालकेँ सम्मन जारी कऽ २ फरवरीकेँ उपस्थित होयबाक लेल कहने छल। ईडी कहने छल जे केजरीवाल झूठ बहाना बना कऽ सम्मनक लगातार अनदेखी कऽ रहल छथि। ईडी आगू कहलक जे जँ हुनका सन शीर्ष पद पर रहनिहार लोक एहि तरहेँ कानूनक उल्लंघन करैत छथि तऽ ई आम लोककेँ गलत संदेश जायत। एहिसँ पहिने आम आदमी पार्टी कहने छल जे मुख्यमंत्री ईडीक समक्ष उपस्थित नहिं होयत किएक तँ ई मामिला अदालतमे अछि। सुनवाई १६ मार्चकेँ अछि। आम आदमी पार्टी कहलक जे जांच एजेंसीकेँ लगातार सम्मन पठयबाक बदला अदालतक आदेशक प्रतीक्षा करबाक चाही, कियैक तँ ई मामला एखनो अदालतमे अछि।
