मधवापुर प्रमुख पर लागल अविश्वास प्रस्ताव पर बहस होयत १६ जनवरीकेँ  

समदिया मधुबनी

*

मधवापुर प्रखंड प्रमुख पर लगाओल गेल अविश्वास प्रस्ताव पर बहस के ल’ 16 जनवरी क अपराह्न 2 बजे सँ आईटी भवन सभागारमे पंचायत समितिक विशेष बैसार बजाओल गेला। एकरा लेल सभ तरहक प्रशासनिक तैयारी पूर्ण कय लेल गेल अछि। जनतब दी जे प्रखंडक 17 मे सँ 11 पंचायत समिति सदस्यक प्रखंड प्रमुख पर अविश्वास प्रस्ताव के ल’ प्रमुख केँ नाम संबोधित पत्र पंचायत समितिक कार्यपालक पदाधिकारी सह प्रखंड विकास पदाधिकारीकेँ देने छल। एहि पत्रक आलोकमे कार्यपालक पदाधिकारी सह प्रखंड विकास पदाधिकारी राजेश कुमार द्वारा अविश्वास प्रस्ताव पर बहस करबाक लेल विशेष बैसार बजौलैथ अछि। ओ कहलैन्ह अछि जे एहि बातक जनतब पत्रक माध्यमसँ प्रमुख, उप प्रमुख सङ्ग सभ 17पंचायत समिति सदस्य, मुखिया, संबंधित विभागक पदाधिकारी आर जनप्रतिनिधि केँ दऽ देल गेला। आगाँ बीडीओ राजेश कुमार कहलैन्ह जे शांतिपूर्ण वातावरणमे बैसार संपादित करेबाक लेल कड़गड सुरक्षा व्यवस्थाक व्यवस्था सेहो कयल गेल अछि। एकर जनतब जिला पदाधिकारी, जिला पुलिस अधीक्षक, एसडीएम, एसडीपीओ आ मधवापुर आर साहरघाट थानाध्यक्षकेँ सेहो देल गेल अछि। बतबैत चली जे अविश्वास प्रस्ताव के ल’ देल गेल पत्रमे असंतुष्ट सदस्य प्रमुख पर कर्तव्यक प्रति सचेष्ट नहिँ रहबाक, दायित्वक सहीसँ निर्वहन नहिँ करबाक आर हुनका पर सदस्यक विश्वास नहिँ रहबाक आरोप लगौने छथि। एहि पत्रमे पंचायत समिति सदस्य सुनीता देवी, इंदु देवी, जसीना खातून, रुदल सहनी, रामसेवक मंडल, ओमप्रकाश, अविनाश कुमार, विनय कुमार झा, दीपक कुमार सिंह, वीना देवी आर करपुरा देवी हस्ताक्षर कयने छथि। एहि तरहक आरोप के ल’ हाड़ कंपकंपाब वला जाड़मे प्रखंडक राजनीतिक पारा गरमा गेल अछि। देखबाक ई अछि जे प्रमुख लीला देवी अपन कुर्सी बचाबमे सफल रहैत छैथ वा गंवा दैत छैथ।