मिथिला क्षेत्रीय बिहारक दरभंगामे भाजपा सांसद गोपालजी ठाकुरक एकटा वीडियो सोशल मीडिया पर वायरल भऽ रहल अछि। गोपालजी ठाकुर लोकसभा चुनावक कारण वोट मांगय लेल अपन संसदीय क्षेत्र पहुँचल छलाह। एहि दौरान ओतय उपस्थित गामक लोक हुनका घेरि लेलक आ एकक बाद एक कतेको प्रश्न पूछलक। गामक लोकक कहब छनि जे ओ एहि क्षेत्रक मतदाता छथि आ प्रश्न पूछब हुनकर अधिकार अछि। फिलहाल, ई वीडियो सोशल मीडिया पर तेजीसँ वायरल भऽ रहल अछि, जकरा विभिन्न प्रतिक्रिया भेटि रहल अछि। सांसद गोपालजी ठाकुरकेँ पाँच साल बाद अपन संसदीय क्षेत्रमे जेनाइ भारी पड़ल। एतय लोकसभ हुनकर घोर विरोध कयलक आ हुनका सभकेँ घेरि लेलक। बजबाक मौका नहि देल गेल, वाचाल कहायवाला गोपालजी ठाकुरक मानू वाक् हरण भऽ गेल। वायरल वीडियोमे साफ देखल जा सकैत अछि जे एहि दौरान सांसद गोपालजी ठाकुर कुर्सी पर बैसल छलाह। जखन कि गामक लोकक भीड़ हुनका चारू कात ठाढ़ अछि। गामक लोक सांसदसँ एकक बाद एक कतेको प्रश्न पूछलखनि आ गोपालजी ठाकुरकेँ बजबाक मौका पर्यंत नहिं देलकनि। ओतय उपस्थित लोकसभ सांसदसँ पाँच सालमे हुनक द्वारा कयल गेल काजक हिसाब देबाक लेल कहलक। लोकसभ कहलक जे ओ ओहि क्षेत्रक मतदाता छथि, प्रश्न पूछब हुनकर काज अछि। ओ कहैत छथि जे ओ सांसद गोपालजीकेँ वोट दऽ कऽ जीता चुकल छथि आ आब हुनका एमपी जी द्वारा ५ सालमे कयल गेल विकास कार्यक लेखा जानय केर अधिकार अछि।
गामक लोकक अनुसार, जीतलाक बाद पाँच साल धरि गोपालजी नहिं तँ एहि क्षेत्रमे उपस्थित भेलाह आ ने पञ्चायतमे विकासक कोनो योजना देलनि। एहि दौरान एकटा युवक सांसद गोपालजीसँ पुछलखिन जे प्रधानमंत्रीक कारण मिथिलांचलक दरभंगामे एम्सक घोषणा भेल छल, मुदा आइ धरि एम्स केर आधारशिला नहिं राखल गेल अछि। आब पुनः बिहारमे भाजपा आ जेडीयू केर सरकार सेहो अछि। तकर बादो दरभंगामे एम्स नहिं बनल आ ने सांसद एकरा लेल कोनो ठोस डेग उठौलनि अछि।
वायरल वीडियोक अनुसार, एकटा बुजुर्ग सांसद गोपालजीकेँ घेरलाक बाद बचाव करबाक प्रयास कऽ रहल छथि। संगहि लोकक कहब छनि जे हुनका सांसदसँ बहुत अपेक्षा अछि मुदा ओ हुनकर अपेक्षा पर खरा नहिं उतरि रहल छथि। एहि वीडियोमे सांसद गोपाल जी ठाकुर माला पहिरने कुर्सी पर बैसल देखल गेलाह, बुजुर्गक हस्तक्षेपक कारण बाहर आनल गेलाह, जतय सांसद गोपाल जी ठाकुर जनताकेँ मनाबय केर कोशिश कऽ रहल छलाह।
