ग्राहक बनि अपराधी सिगरेट आ कोल्डड्रिंक माँगलक आ मारलक गोली

समस्तीपुर समदिया
*

बिहारक समस्तीपुर जिलाक रहीमपुर अदौलीमे एकटा सनसनीखेज घटनामे अपराधी दोकानदारक बेटाके गोली मारि देलक। एहि घटनासँ इलाकामे दहशत मचल आ लोक आतंकित भs गेल अछि। पुलिस आरोपीक तलाश तेज कs देलक अछि।

ई घटना मुफसील थाना क्षेत्रक वार्ड नम्बर 41 मे स्थित अर्जुन रायक किराना दुकान पर भेल अछि। जानकारीक अनुसार दू टा मोटरसाइकिल सवार तीन युवक दोकान पर पहुंचल आ पहिने कोल्ड ड्रिंक आ सिगरेट मांगलक। दोकानदार अर्जुन राय ओकरा सबकेँ ई सब सामान देलखिन, तकर बाद युवक सब ओतयसँ चलि गेल।
किछु समय बाद एकटा युवक बिट्टू कुमार वापस आबि अर्जुन रायक बेटा जयरामकेँ गोली मारि देलक। गोली लगलासँ जयराम गंभीर रूपसँ घायल भs गेल। तुरंत हुनका कृष्ण अस्पतालमे भर्ती कराओल गेल, जतय हुनकर इलाज चलि रहल अछि।गोलीबारी सुनि आसपासक लोक मौका पर पहुँचल, मुदा ताधरि अपराधी भागि गेल छल।

पुलिस मौकासँ गोली आ खोखा बरामद कs आरोपीक पहिचान करय लेल जांच शुरू कs देलक अछि, पुलिसक कहब अछि जे आरोपीकेँ गिरफ्तार करय लेल विशेष टीम बनाओल गेल अछि आओर जल्दिये पकड़ल जाएत।

एहि घटनासँ स्थानीय लोकमे आक्रोश पैदा भs गेल अछि। इलाकामे बढ़ैत अपराधकेँ लs कs लोक पुलिससँ कड़ा कारवाई केर मांग कय रहल छथि, सुरक्षा व्यवस्था पर सवाल उठबैत आब लोक चाहैत छथि जे एहि तरहक घटनासँ बचबा लेल ठोस डेग उठाओल जाए।