बिहारमे मतदाता सूचीक पुनरीक्षणसँ वंचित होयत करोड़ों वोटर : कांग्रेस

पटना समदिया
*

कांग्रेस नेता राजेश राम कहलनि जे बिहारक तीन करोड़सँ बेसी लोक देश भरिमे पलायन कय चुकल छथि। जँ निर्धारित समयमे घर वापस नहि आबि सकैत छथि तऽ हुनकर नाम एहि सूचीमे नहि जोड़ल जाएत।

बिहार विधानसभा चुनावस पहिने मतदाता सूचीमे संशोधनक बीच राज्य कांग्रेस अध्यक्ष राजेश राम चुनाव आयोगक प्रक्रिया पर गंभीर सवाल उठेलथि। ओ कहलनि जे, एतेक कम समयमे 8 करोड़ मतदाताक संशोधन करब असंभव अछि। ओ आशंका व्यक्त कयलनि जे एही कारण करोड़ों गरीब, पिछड़ल आ प्रवासी मतदाता मतदानक अधिकारसँ वंचित भऽ सकैत अछि।

विशेष साक्षात्कारमे राजेश राम कहलनि जे 22 साल पहिने मतदाता सूचीक कम्प्यूटरीकरणक बादसँ एहेन गहन जांच कहियो नहि भेल। पहिने नागरिकता साबित करबाक कोनो जरूरत नहि छल, आब माता-पिता आ दादा-दादी तक केर दस्तावेज मांगल जा रहल अछि। बिहारक तीन करोड़सँ बेसी लोक काजक लेल देश भरिमे पलायन कय चुकल छथि। जँ निर्धारित समयमे घर वापस नहि आबि सकलाह तऽ हुनकर मतदाता सूचीमे नाम नहि जोड़ल जाएत आ ई प्रक्रिया भाजपाकेँ सीधा फायदा पहुंचेबा लेल अपनाओल गेल अछि।”

ओ आगू कहलनि, जे लोक वंचित हेताह ओ बेसीतर गरीब, दलित, पिछड़ा वर्गक लोक छथि। ई लोक परंपरागत रूपसँ इंडी गठबंधनकेँ वोट दैत छथि। एहिसँ भाजपाकेँ सीधा राजनीतिक लाभ भेटत।” संगहि ओ कहलनि जे, मतदाता सूचीसँ नाम हटाबयसँ मतदान पर असर पड़त, पेंशन, जॉब कार्ड आओर अन्य सरकारी योजना पर सेहो असर पड़त। भाजपा जतय लाभ देखैत अछि ओतय आधार अनिवार्य बना दैत अछि। तखनि मतदाता सूचीमे आधारक लिंक किएक नहि मानल जा रहल अछि ? सब ठाम सभ किछु आधारसँ जोड़ल गेल अछि, मुदा मतदानक समय एकरा अनदेखी कयल जा रहल अछि।

राजेश राम कहलनि जे, हम राहुल गांधी आ मल्लिकार्जुन खड़गेक नेतृत्वमे बिहार कांग्रेसक तेजीसँ पुनर्गठन कयलहुँ अछि। जिला अध्यक्षक पुनर्गठन भेल अछि, झंडा यात्रा, संविधान सम्मेलन आ ‘हर घर झंडा’ सन कार्यक्रम ग्राउंड पर सक्रिय अछि। ‘माई बहिन मान योजना’ जेहन बहुत रास योजनाक माध्यमसँ महिला आ गरीब मतदाताक बीच कांग्रेस मजबूत पैर जमा रहल अछि। राहुल गांधी द्वारा शुरू कएल गेल सामाजिक न्यायक लड़ाईमे जाति जनगणना एकटा महत्वपूर्ण मुद्दा अछि । हम सब एहि सिद्धांत पर काज कऽ रहल छी जे ‘जतेक बेसी सहभागिता होयत, ओतेक बेसी हिस्सेदारी’।

बिहार चुनावमे सीट बंटवारा पर कांग्रेस नेता कहलनि जे, “अखिल भारतीय गठबंधनक सब घटकक बीच ‘सकारात्मक बातचीत’ चलि रहल अछि आ अधिकांश मुद्दाक समाधान भऽ गेल अछि। सब दल एकमत अछि जे अगर हम सब एकजुट नहि होयब तऽ जनताकेँ नुकसान होयत। हम सब डेग-डेग पर आगू बढ़ि रहल छी।”

एमआईएमआईएम केर इंडी गठबंधनमे शामिल हेबाक चर्चा पर ओ कहलनि जे हमरा सब लग एहेन कोनो प्रस्ताव नहि आयल अछि, ई साफ नहि अछि जे मीडियामे जे बात कहल जा रहल अछि ओ कतेक तथ्यात्मक अछि।