दिल्लीमे विधानसभा चुनावक लेल हलचल तेज भऽ रहल अछि। आम आदमी पार्टी (आप) आ कांग्रेसक बीच झगड़ा बढ़ि गेल अछि। आम आदमी पार्टी कांग्रेससँ अजय माकन केर खिलाफ कारवाईक मांग कयलक अछि। दिल्लीक मुख्यमंत्री आतिशी कहलनि जे कांग्रेसक बयानसँ ई स्पष्ट भऽ गेल अछि जे कांग्रेस दिल्ली चुनावक लेल भाजपाक सङ्ग समझौता कयलक अछि। काल्हि कांग्रेसक वरिष्ठ नेता अजय माकन कहलनि जे अरविंद केजरीवाल देशद्रोही छथि। हम कांग्रेस पार्टीसँ पूछय चाहैत छी जे की ओ कहियो कोनो भाजपा नेताक खिलाफ एहने आरोप लगओने छथि ? नहिं, मुदा आइ कांग्रेस अरविन्द केजरीवालपर देशद्रोही होयबाक आरोप लगा रहल अछि। काल्हि, कांग्रेस हमरा आ अरविन्द केजरीवालक खिलाफ प्राथमिकी दर्ज कयलक। कियैक? की कांग्रेस कहियो कोनो भाजपा नेताक खिलाफ कोनो प्राथमिकी दर्ज कयलक अछि ?
सीएम आतिशी कहलनि, “हमरा विश्वसनीय सूत्रसँ पता चलल अछि जे कांग्रेस उम्मीदवारक चुनावी खर्च भाजपासँ आबि रहल अछि। भाजपा कांग्रेसक उम्मीदवारकेँ फंड दऽ रहल अछि। हम सुनलौंह अछि जे संदीप दीक्षितकेँ भाजपासँ फंड भेटि रहल अछि। जँ कांग्रेसकेँ लगैत अछि जे हम (आम आदमी पार्टी) राष्ट्रविरोधी छी तखनि ओ लोकसभाक चुनाव हमरासँ गठबन्धन कऽ किएक लड़लक ? ई स्पष्ट अछि जे कांग्रेसक नेता आम आदमी पार्टीकेँ हराबय आ दिल्लीमे भाजपाकेँ जीतयबाक लेल भाजपाक सङ्ग किछु आपसी समझौता कयने छथि। जँ कांग्रेस आ भाजपाक बीच कोनो समझौता नहि भेल तऽ हुनका अजय माकनक खिलाफ २४ घंटाक भीतर कारवाई करय के चाही।”
आम आदमी पार्टीक नेता संजय सिंह कहलनि जे कांग्रेस दिल्ली चुनावमे भाजपाकेँ जितयबाक लेल हरसंभव प्रयास कऽ रहल अछि। भाजपा कांग्रेसकेँ वित्त पोषण कए रहल अछि। अजय माकन भाजपाक पटकथा पढ़ि रहल छथि। अजय माकन अरविन्द केजरीवालकेँ ‘गद्दार’ कहैत छथि, पार्टीकेँ हुनका खिलाफ २४ घंटाक भीतर कारवाई करबाक चाही।
संजय सिंह कहलनि जे कांग्रेस नेता अजय माकन भाजपा द्वारा पठाओल पटकथा पढ़ैत छथि आ आम आदमी पार्टीक नेतासभकेँ निशाना बनबैत छथि। अरविन्द केजरीवाल दिल्लीवासीक लेल बिजली, पानि, स्वास्थ्य आ शिक्षाक व्यवस्था कयलनि, मुदा कांग्रेस केजरीवालकेँ देशद्रोही कहलक। कांग्रेस सभ सीमा पार कए चुकल अछि। कांग्रेस आलाकमान २४ घंटामे अजय माकन पर एक्शन लैथ, अन्यथा हम कांग्रेसकेँ इंडिया गठबन्धनसँ अलग करय केर मांग करब।
