पहिल बेर बिहारक दौरा पर आएल सीपीआईएमक नव-निर्वाचित राष्ट्रीय महासचिव एमए बेबी पत्रकार सबसँ बातचीत कयलनि। सीपीआई (एम) केर नव-निर्वाचित राष्ट्रीय महासचिव एमए बेबी सोमदिन पहिल बेर दु दिनक बिहार दौरा पर पहुँचलाह। बेबी महागठबंधनमे शामिल सहयोगी दलकेँ नेता सबसँ भेंट कय आगामी विधानसभा चुनावक रणनीतिसभ पर चर्चा करताह।
पटनामे ओ पत्रकार सबसँ बातचीत कएलनि। एहि दौरान ओ कहलनि जे गठबंधनमे शामिल सभ पार्टिक नेता सबसँ चर्चा होएत।
बेबी कहलनि, “हमर अप्रोच बीजेपीकेँ हराएब आ महागठबंधनकेँ आगू बढ़ाएब अछि। महागठबंधनमे शामिल पार्टीक नेता सभसँ बातचीतक जानकारी पत्रकार सभकेँ देल जायत।” महागठबंधनमे सीएम फेसकेँ ल’ कऽ फंसल पेंच पर सीपीआईएम नेता स्थिति साफ कए देलनि। ओ कहलनि जे सीएम फेसक सन्दर्भमे फैसला समय पर होएत। पहिने सभ सहयोगी पार्टी सभसँ चर्चा कयल जायत।
पहिल बेर बिहार आएल सीपीआईएमक नव निर्वाचित राष्ट्रीय महासचिवकेँ पटनामे कार्यकर्ता सभ जोरदार स्वागत कएलनि।
एमए बेबी 5 मईकेँ पटनामे बैसार आ विभिन्न राजनीतिक दल केर नेता सभसँ भेंट करबाक कार्यक्रम छल। आजुक दिन 6 मई कऽ मधुबनीमे दिवंगत भोगेंद्र यादव केर प्रतिमाक सीपीआईएम नेता द्वारा अनावरण होयत। बेबी संग पोलित ब्यूरो सदस्य अशोक धावले, राज्य सचिव ललन चौधरीक अलावा विधायक आ प्रदेश प्रमुख पदाधिकारी सभ मौजूद रहताह। पार्टीक नेता सभ कहलनि जे दुपहरिया बाद प्रदेश कार्यालय जमाल रोडमे बैसार होयत।
साँझमे बेबीकेँ सहयोगी राजनीतिक दलक नेता सभसँ भेंट करबाक कार्यक्रम अछि।
एहि बीच, कांग्रेसक राष्ट्रीय महासचिव रणदीप सुरजेवाला सेहो काल्हि पटना पहुँचलाह। ओ पटना पहुँचलाक बाद पत्रकार सभ संग बातचीतमे बिहारकेँ ज्ञानक धरती कहलनि। ओ कहलनि, एहिठामसँ हमेशा किछु नहि किछु अर्जित कऽ जाइत छी। प्रेस कांफ्रेंसमे पत्रकार सभक सभ सवालक उत्तर देल जायत।
जनतब जे एहि सालक अंतमे विधानसभा चुनाव प्रस्तावित अछि। सभ राजनीतिक दलसभ चुनावक तैयारी शुरू कय चुकल अछि। महागठबंधनमे संलग्न घटक दलसभक रविकेँ बैसार भेल। राजद नेता तेजस्वी यादवक अध्यक्षतामे बैसारमे आगामी चुनावी रणनीतिसभ पर चर्चा भेल आ सभ घटक दलसभक जिला स्तरसँ ल’ कऽ प्रखंड स्तर धरि समन्वय पर विचार-विमर्श कयल गेल।
