देशमे कोरोना संक्रमणक बढ़ैत गति डराबय लागल अछि। कोरोना संक्रमणक सक्रिय केसक संख्या 6000 पार कय गेल अछि। पिछला 24 घंटामे छह कोरोना संक्रमितक मृत्यु भऽ गेल अछि। केरल एखनो देशके सबसँ बेसी प्रभावित राज्य बनल अछि। एहि ठाम कुल 1950 कोरोना केस अछि। पिछला 24 घंटामे 144 केर बढ़ोतरी देखल गेल अछि। एकर बाद गुजरातमे 822, दिल्लीमे 686, महाराष्ट्रमे 595, कर्नाटकमे 366, उत्तर प्रदेशमे 219, तमिलनाडुमे 194, राजस्थानमे 132 आ हरियाणामे 102 कोरोनाक मामिला सामने आयल अछि।
पिछला 24 घंटामे भेल मृत्युक बात करी तँ केरलमे तीन कोरोना संक्रमितक मृत्यु भऽ गेल। एकटाक उम्र 51 साल, दोसरक उम्र 64 साल आओर तेसरक उम्र 92 साल बताओल गेल अछि। तीनू गोटे पुरुष छलाह आ तीनू गोटेकेँ पहिनेसँ बहुत रास बीमारी छलनि। तहिना कर्नाटकमे कोरोना संक्रमित दू गोटेके मृत्यु भेल अछि। जान गंवा देनिहार दुनू आदमी 51 आ 78 सालक छलथि। दुनू गोटे स्वास्थ्य संबंधी समस्यासँ सेहो ग्रस्त छलाह। एकर अलावा तमिलनाडुमे ४२ वर्षीय पुरुषक कोरोना संक्रमणसँ मृत्यु भऽ गेल।
केंद्रीय स्वास्थ्य मंत्रालयक आंकड़ाक अनुसार भारतक सक्रिय कोविड केस पिछला 48 घंटामे 769 नव संक्रमणक संग 6000 केर पार कय गेल अछि। सरकारी सूत्रक अनुसार कोविड केस बढ़लाक कारण केंद्र सरकार सुविधा स्तरक तैयारीक जांचक लेल मॉक ड्रिल कय रहल अछि। सब राज्यकेँ ऑक्सीजन, आइसोलेशन बेड, वेंटिलेटर आ आवश्यक दवाईक उपलब्धता सुनिश्चित करबाक निर्देश देल गेल अछि।
मंत्रालय कहलक अछि जे भारतमे 6133 सक्रिय कोविड केस अछि। पिछला 24 घंटामे 6 गोटेक मृत्यु भऽ चुकल अछि। सरकारी सूत्रक अनुसार अधिकांश मामिला हल्का अछि आ होम केयर आइसोलेशनमे ठीक भऽ रहल अछि। एहि साल जनवरीसँ देशमे 65 गोटेक मृत्यु भऽ चुकल अछि। 22 मईकेँ देशमे कुल 257 सक्रिय मरीज छल।
एहिसँ पहिने 2 आ 3 जूनकेँ स्वास्थ्य सेवा महानिदेशक डॉ. सुनीता शर्माक अध्यक्षतामे तकनीकी समीक्षा बैसारक एकटा श्रृंखला आयोजित कयल गेल छल जाहिमे वर्तमान कोरोना स्थिति आ तत्परताक मूल्यांकन करय लेल आपदा प्रबंधन प्रकोष्ठ, आपातकालीन प्रबंधन प्रतिक्रिया (ईएमआर) सेल, राष्ट्रीय रोग नियंत्रण केंद्र (एनसीडीसी), भारतीय चिकित्सा अनुसंधान परिषद (आईसीएमआर), एकीकृत रोग निगरानी कार्यक्रम (आईडीएसपी), दिल्लीमे केंद्रीय सरकारी अस्पताल आ सब राज्यक आ केन्द्र शासित प्रदेशक प्रतिनिधि शामिल छलाह।
