प्रधानमंत्री नरेन्द्र मोदी भाजपा उम्मीदवार राज भूषण निषादक समर्थनमे बिहारक मुजफ्फरपुरमे एकटा चुनावी जनसभाकेँ सम्बोधित कयलनि। एहि दौरान पीएम मोदी विपक्ष पर जोरदार आक्रमण कयलनि।
प्रधानमंत्री कहलनि, “देश कमजोर, कायर आ अस्थिर सरकार नहिं चाहैत अछि। कांग्रेसकेँ तऽ रातिमे सपनामे सेहो पाकिस्तानक परमाणु बम देखाई दैत अछि। डरपोक प्रधानमंत्री देश नहिं चला सकैत अछि। की अहाँ एहन लोककेँ देश दए सकैत छी ?
ओ कहलनि जे इंडी गठबंधनक लोकक बयान अबैत अछि जे पाकिस्तान चूड़ी नहिं पहिरने अछि, तऽ पहिरा देब। पाकिस्तानक लोक लग आटा आ बिजली नहिं अछि। मुदा, चूड़ी सेहो नहिं अछि, से नहिं ज्ञात छल। ई लोक मुम्बईमे हमला करयवलासभकेँ सेहो क्लीन चिट दैत रहलाह अछि। वाम दलक लोक तऽ भारतक परमाणु हथियार सेहो समाप्त करय चाहैत अछि। एहन लगैत अछि जे ई लोकसभ भारतक विरुद्धे ककरोसँ सुपारी लऽ लेने छथि।
प्रधानमंत्री मोदी लालू यादव पर निशाना साधैत कहलनि जे ओ दलित, महादलित, पिछड़ा, आदिवासीसँ मुसलमानकेँ पूरा आरक्षण देबय चाहैत छथि। ई देश एहन कोनो कृत्यक अनुमति नहिं देत। हम मरि जाएब, लेकिन, हम आरक्षण केकरो देबए नहिं देब।
ओ आगू कहलनि जे जंगलराजक जीवन भयानक आ डरावना छल, एनडीए सरकारक गठनक बाद कानून व्यवस्था फेरसँ पटरी पर आनल गेल। दस साल पहिने महंगाई केर की स्थिति छल ? तहिया एक्कहि गीत चलैत छल जे ‘महंगाई डायन खाए जात है।’ ओहि समय महीनाक ३० हजार आमदनी पर कांग्रेस सरकार कहैत छल जे टैक्स अदा करू। आइ मोदी एहन सुधार कयलक छथि जे अहाँकेँ ५० हजार धरिक मासिक आमदनी पर एक पाइ कर नहिं देबय पड़त।
लीचीक लेल प्रसिद्ध मुजफ्फरपुरमे पीएम मोदी कहलनि जे हमर सरकार मुजफ्फरपुरक लीचीकेँ जीआई टैग देलक। आबयवला पाँच सालमे फल आ तरकारीक लेल विशेष स्टोरेज बनय जा रहल अछि। हम फूड प्रोसेसिंग केर लेल सेहो तेजीसँ काज करब। मत्स्य पालनकेँ बढ़ावा देबाक लेल मछुआरा लेल एकटा अलग मंत्रालय सेहो बनाओल गेल अछि।
