आगामी लोकसभा चुनावके देखैत देश भरिमे राजनीतिक उठापटक जे, विगत दू वर्षसँ शुरू अछि, ओ एखनहु बदस्तूर जारी अछि। कांग्रेस हाई कमान कोन रणनीति पर कार्य क’ रहल अछि, नहि जानि मुदा, पार्टीक अनेको वरिष्ठ आ लोकप्रिय नेता, नित् पार्टी छोड़ि रहल छथि। सोझ भाषामे कहल जाए त’ पार्टी एखन देशक विभिन्न छोट – छोट क्षेत्रीय दलक समक्ष शरणागत भेल अछि। बिहारसँ महाराष्ट्र आ दिल्लीसँ गुजरात धरि, हर ठाम पार्टी, सीट शेयरिंगके मुद्दा पर समझौता करैत देखल गेल अछि। विपक्ष द्वारा आरोप लगाओल जाइत छैक कि, केंद्रीय जाँच एजेंसीक भय देखा, विपक्षी नेता सभकेँ भाजपामे शामिल कराओल जाइत छैक, मुदा विगत किछु दिनमे किछु एहेनो नेता सभ भाजपामे शामिल भेलाह, जे कोनो घोटाला वा विवादमे शामिल नहि छलाह। कांग्रेस छोड़ि रहल तमाम नेता, पार्टीक शीर्ष नेतृत्व पर रंग – बिरंगक आरोप लगा रहल छथि। पार्टीमे अनुशासनक आभाव त’ सभ दिन रहलैक, मुदा एखन पार्टीमे ई समस्या अप्पन चरम पर अछि। नेता सभ पार्टी छोड़ि रहल छथि आ कांग्रेस आलाकमान लेल धन्न – सन्न, आखिर किएक ? त’ कांग्रेस पार्टीसँ निष्कासित नेता संजय निरुपम पार्टीक भीतर अनेको शक्ति केन्द्रक गप्प कहैत छथि। तहिना कांग्रेस पार्टीक पूर्व प्रवक्ता गौरव वल्लभ, पार्टी पर सनातन विरोधी होयबाक आरोप लगा रहल छथि। अनेको नेता द्वारा कहल जा रहल अछि कि, पार्टी अप्पन विचारधारा त्यागि चुकल अछि, आ पार्टीक शीर्ष टीममे वामपंथी विचारधारा हावी भेल अछि। कहबाक तात्पर्य ई, जे पार्टीसँ त्यागपत्रक अनेको वजह भ’ सकैत छैक, मुदा हर नेता पार्टी छोड़लाक उपरांत नाना प्रकारक आरोप पार्टी आलाकमान पर लगबैत अप्पन त्यगपत्रके उचित सिद्ध करबाक प्रयास सेहो क’ रहल छथि। तहिना पार्टीक शीर्ष नेतृत्व द्वारा, एहि सभ पर अंकुश लगएबाक प्रयास सेहो नहि भ’ रहल अछि जे, पार्टी लेल शुभ संकेत नहि मानल जा सकैत छैक। कांग्रेस नेता राहुल गाँधी, मुखरतासँ मात्र पीएम मोदी आ केंद्र सरकारक नीतिके विरोध करैत रहल छथि। चीन, पाकिस्तान संगहि तमाम ओ विषय, जे राष्ट्रसँ संबंधित अछि, ओहि तमाम मुद्दा पर राहुल, अप्पन विदेश यात्राक दौरान वेवाकीसँ राय रखैत देखल जाइत छथि। कएक बेर त’ पीएम मोदीक विरोध करैत राहुल द्वारा विदेशमे देल गेल वक्तव्य पर, विरोध सेहो भेल अछि, सत्ता पक्षक आरोप रहल अछि कि, राहुल विदेशसँ अप्पन बयान जारी करैत, भारत विरोधी तत्वक तरफदारी करैत छथि। विगत किछु समयसँ राहुल गाँधी, जातीय जनगणना पर सेहो प्रमुखतासँ अप्पन बात रखबाक प्रयास क’ रहल छथि। मुदा आब राहुल गांधी, जाति जनगणनाक अतिरिक्त देशक संपत्ति पर नियंत्रण ज्ञात करबाक लेल सर्वे करएबाक घोषणा सेहो कएलनि अछि। तेलंगानामे एकटा रैलीके संबोधित करैत कांग्रेस नेता कहलनि कि, जौं कांग्रेस सत्तामे आओत त’ ओ ई ज्ञात करबाक लेल वित्तीय एवं संस्थागत सर्वे कराओत कि, देशक अधिकतर संपत्ति पर किनकर नियंत्रण अछि। राहुल गांधी कहलनि कि, राष्ट्रव्यापी जाति जनगणनाक अतिरिक्त वेल्थ सर्वे सेहो कराओल जाएत। अप्पन वचनबद्धता दोहराबैत राहुल कहलनि कि, जेकर जतेक आबादी, ओकर ओतेक अधिकार, मात्र तखनहि चरितार्थ होयत जहन देशमे जाति जनगणना कराओल जाएत। आब राहुल गांधीक एहि घोषणा पर एखन धरि कोनो आन दल वा नेताक प्रतिक्रिया त’ नहि सोझा आयल अछि, मुदा एहि बयान पर राजनीति अवश्य होयत, ई तय मानल जा रहल अछि। राहुल कहैत छथि कि, देशमे सभसँ पहिने ई निर्धारण होयबाक चाही कि, कोन जाति वा समुदायक लोक कतेक अछि। सोझ भाषामे कहल जाए त’ राहुल चाहैत छथि कि, देशमे ओबीसी एससी – एसटी आओर अल्पसंख्यक समुदायक जनसँख्या ज्ञात कएल जाए। तदुपरांत इहो पता लगाओल जाए कि, देशक संपत्ति पर किनकर कतेक नियंत्रण अछि। आ ई तमाम जानकारी वेल्थ सर्वेसँ ज्ञात कएल जा सकैत छैक। राहुल गाँधीकेँ अनुसार, वेल्थ सर्वे एहि लेल कराओल जाएत कि, हर समुदायक प्रतिनिधित्व सुनिश्चित कएल जा सकए। समाजक मुख्यधारासँ कटल लोककेँ ओकर अधिकार भेटि सकए। राहुल गाँधी अप्पन तर्कमे कहैत छथि कि, देशक जनसंख्याक 90 प्रतिशत भाग, एससी-एसटी, ओबीसी आ अल्पसंख्यक अछि, मुदा नौकरीमे देखल जाए त’ हुनका सभकेँ उचित स्थान नहि देल गेल अछि। सत्य इएह अछि कि, एहि 90 प्रतिशत आबादी लग कोनो तरहक भागीदारी नहि छैक। तैं राहुल कहैत छथि कि, सत्ता प्राप्तिक उपरांत एहि वर्गके हुनकर अधिकार देल जाएत। एतेक रास मुद्दा आ विषय पर राहुल गाँधी बेवाकीसँ अप्पन बात रखैत छथि, मुदा पार्टीक भीतर चलि रहल घमासान पर चुप छथि। कांग्रेस पार्टीसँ भागि रहल नेताक सभक मानी त’ ई चुनाव, कांग्रेस पार्टी लेल एकटा अवसर सिद्ध भ’ सकैत छल। मुदा कांग्रेस पार्टी, भाजपाके सत्तासँ हटएबाक मदमे चूर भ’ एहि अवसरके सेहो अनदेखा क’ रहल अछि। देशक तमाम क्षेत्रीय दल एखन, अप्पन अस्तित्व लेल संघर्ष क’ रहल अछि, आ भाजपा सदैवसँ क्षेत्रीय राजनीतिक विरोधी रहल अछि। त’ कांग्रेस पार्टी आ राहुल गाँधी एहि अवसरक लाभ उठा सकैत छलाह मुदा पार्टी आलाकमान एहि सभक प्रति उदासीन प्रतीत भ’ रहल अछि।
