पहिल चरणक मतदानक बाद आब राजनीतिक दल दोसर चरणक चुनावक लेल प्रचार शुरू कऽ देलक अछि। रवि कऽ झारखण्डक राजधानी रांचीमे विपक्षी गठबंधन दलक रैली भेल। एम्हर कांग्रेस सांसद राहुल गाँधीक स्वास्थ्य अचानक बिगड़ि गेल, जाहि कारणेँ ओ आब एहि रैलीमे शामिल नहि भऽ सकलथि। पार्टी नेता जयराम रमेश एहि बातक जानकारी देलनि।
रमेश सोशल मीडिया प्लेटफॉर्म एक्स पर पोस्ट कयलनि, “राहुल गांधी आइ सतना आ राँचीमे प्रचारक लेल पूर्ण रूपसँ तैयार छलाह, जतय इंडी एलायंसक रैली आयोजित कयल जा रहल अछि। मुदा ओ अचानक बीमार भऽ गेलाह आ फिलहाल नई दिल्लीसँ बाहर नहिं जा सकैत छथि। कांग्रेस अध्यक्ष मल्लिकार्जुन खड़गे सतनामे जनसभाकेँ सम्बोधित कयलाक बाद राँचीमे आयोजित रैलीमे निश्चित रूपसँ भाग लेताह।”
कांग्रेस संसदीय दलक अध्यक्ष सोनिया गांधी, पार्टी सांसद राहुल गांधी, दिल्लीक मुख्यमंत्री अरविंद केजरीवाल, पश्चिम बंगालक मुख्यमंत्री ममता बनर्जी, झारखंडक पूर्व मुख्यमंत्री हेमंत सोरेन आ हुनक पत्नी कल्पना सोरेन सहित विपक्षी गठबंधनक नेता सभक फोटोवाला पोस्टर राँचीक रैली ग्राउंडमे लगाओल गेल छल।
प्रभात तारा मैदानमे आयोजित होबय बला एहि रैलीमे कुल १४ टा राजनीतिक दल भाग लेलनि। कांग्रेस अध्यक्ष मल्लिकार्जुन खड़गे, नेशनल कॉन्फ्रेंसक अध्यक्ष फारूक अब्दुल्ला, समाजवादी पार्टी प्रमुख अखिलेश यादव, टीएमसी सांसद डेरेक ओ ब्रायन, शिवसेना (यूबीटी) केर नेता प्रियंका चतुर्वेदी आ भारतीय कम्युनिस्ट पार्टी (मार्क्सवादी-लेनिनवादी) लिबरेशन केर दीपांकर भट्टाचार्य सेहो रैलीकेँ संबोधित कयलनि। रैलीमे पांच लाखसँ बेसी लोक प्रायः शामिल भेल।
झारखण्डक मुख्यमंत्री चंपई सोरेन कहलनि जे एहि रैलीमे केन्द्र सरकारक तानाशाही रवैयाक पर्दाफाश कयल जाएत। ओ सोशल मीडिया प्लेटफॉर्म एक्स पर कहलनि, “ई रैली केंद्र सरकार द्वारा राज्यक आदिवासी आ मूल निवासी पर कयल गेल अत्याचार आ हुनका पानि, जंगल आ जमीनसँ दूर करबाक षड्यंत्रक पर्दाफाश करत।
शिवसेना नेता संजय राऊत कहलनि, “हेमंत सोरेनक पत्नी आ उद्धव ठाकरेसँ चर्चा कयलौंह। अहाँ देख सकैत छी जे महाराष्ट्रमे चुनाव प्रचार चरम पर अछि। ठाकरे आइ मुम्बईसँ बाहर जा रहल छथि। हमसभ निर्णय लेलहुं जे हमर पार्टीक एकटा व्यक्ति निश्चित रूपसँ ओतय जायत।”
इंडी एलायंसक रैलीमे शिवसेना सांसद प्रियंका चतुर्वेदी कहलनि, “हमर संदेश बहुत स्पष्ट अछि जे भाजपाक बढ़ैत निरंकुशताक विरुद्ध एहि लड़ाईमे हम सभ एक सङ्ग छी। ओ विपक्षकेँ ठीकसँ काज नहिं करय दऽ रहल छथि। ओ विपक्षकेँ चुप करए केर कोशिश कए रहल छथि। हम मुद्रास्फीति, बढ़ैत बेरोजगारी आ महिलासभकेँ सुरक्षित वातावरण नहिं भेटैत देखि रहल छी। पहिल चरणक चुनावमे बहुत लोक नहिं, बल्कि जे वोट देबय लेल निकलल छलथि, ओ एहि लोकसभ (भाजपा) केँ बदलबाक लेल निकलल छलथि।”
इंडी गठबंधनक रैली पर झामुमो सांसद डॉ. महुआ माजी कहैत छथि, “ई एकटा पैघ रैली अछि आ हमरा नहिं लगैत अछि जे झारखण्डमे एतेक पैघ रैली कहियो भेल अछि। हेमंत सोरेन केर समर्थनमे लोक सामने आबि रहल अछि। हम एहि रैलीकेँ सफलताक लेल निश्चिंत छी। झारखंड झुकि नहिं सकैत अछि आ इंडी गठबंधन नहिं रुकत।”
रैलीकेँ संबोधित करैत, दिल्लीक मुख्यमंत्री अरविन्द केजरीवालक पत्नी सुनीता केजरीवाल भाजपा नेतासभपर “गहींरगर षड्यंत्र”क आरोप लगओलनि। रांचीमे ‘उलगुलान न्याय’ रैलीकेँ संबोधित करैत सुनीता केजरीवाल आरोप लगओलनि जे दिल्लीक मुख्यमंत्री अरविंद केजरीवालकेँ जेलमे मारय केर साजिश रचल जा रहल अछि।
“अरविंद केजरीवाल आ हेमंत सोरेनकेँ जेलमे डालि देल गेल अछि। इ तानाशाहीकेँ दर्शाबैत अछि। ओ कहलनि जे अरविन्द केजरीवालक एकमात्र दोष ई छल जे ओ सरकारी स्कूलक व्यवस्थामे सुधार कयलनि, शिक्षा व्यवस्था नीक बनि गेल, अस्पताल, मोहल्ला क्लीनिक बनौलनि। ओ कहलनि जे अरविन्द केजरीवालमे देशभक्ति पुरा भरल अछि। आई.आई.टी. पास कयलाक बाद हुनक सभ सहयोगी देशसँ बाहर चलि गेलाह, मुदा ओ नहिं गेलाह, हुनका जनसेवा करय केर छल।
आम आदमी पार्टीक नेता संजय सिंह कहलनि जे ओ एहि रैलीक माध्यमसँ प्रधानमंत्री नरेन्द्र मोदीकेँ ई सन्देश देबय चाहैत छथि जे एहि बेर पूरा देश अहाँक (भाजपा) जमानत जब्त करायत। नरेन्द्र मोदी हमरा छह मास धरि जेलमे रखलनि। दिल्लीक मुख्यमंत्री अरविन्द केजरीवाल आ कतेको नेता जेलमे छथि। झारखंडक सभसँ प्रिय नेता हेमंत सोरेनकेँ जेल भेजि देल गेल अछि। अरविन्द केजरीवालक संदेश अछि कि पुरा देश हेमंत सोरेनक संग अछि।
