मिथिला क्षेत्रीय बिहारक किशनगंजक कांग्रेस विधायक इजहारूल हुसैनक मुक्त कंठसँ प्रसंशा हेबाक चाही, अभिनंदन हेबाक चाही, जे जनसंख्या नियंत्रणक समर्थनमे बल्कि एक डेग आर आगू बढ़ैत कहलनि जे – ‘दूइयो टा नहिं बल्कि एक्कहि टा बच्चा हेबाक चाही। एहि तरहसँ जँ मुस्लिम नेतृत्वकर्ता सभ आगू अओताह तऽ निश्चित रुपसँ क्रमशः सभ भेदभाव मिट जाएत आ शिघ्र पुरा देश शिक्षित होएत आ विकसित देशक भांति वास्तविक विकासात्मक पथ पर चलैत विकसित होएत। कारण शिक्षाक प्रकाश भेद-भाव रुपी सभ अंधकार केर मिटा दैत छैक।
कांग्रेस विधायक जनसंख्या नियंत्रण कानून बनेबाक माँग कयलनि अछि। हुनकर तर्क छनि जे कम बच्चा हुनका नीक शिक्षा आ भविष्य देत, जाहिसँ देश समृद्ध होयत।
जनसंख्या नियंत्रण कानून पर एक बेर फेर एकटा नव बहस शुरू भऽ गेल अछि। भाजपा नेता पहिनेसँ जनसंख्या नियंत्रण कानूनक माँग कऽ रहल छलाह, मुदा कांग्रेस विधायक सेहो कानून लागू करबाक माँग कऽ सभकेँ आश्चर्यचकित कऽ देलनि अछि। मिथिला क्षेत्रीय बिहारक किशनगंज सदर निर्वाचन क्षेत्रक कांग्रेस विधायक इजहारुल हुसैन सेहो एहि कानूनकेँ लागू करबाक माँग कयलनि अछि। किशनगंज सदर अस्पताल परिसरमे आयोजित मिशन परिवार विकास अभियानक शुभारंभक अवसर पर विधायक हुसैन जनसंख्या नियंत्रणक पक्षमे लोककेँ जागरूक कयलनि।
विधायक इजहारुल हुसैन लोकसभकेँ सम्बोधित करैत कहलनि जे सरकारक नारा अछि – ‘हम दो हमारे दो’, मुदा हम कहैत छी जे मात्र एकटा बच्चा होयबाक चाही।
