कांग्रेस सोमदिन केन्द्रीय मन्त्री किरेन रिजिजूक ओहि कथित दावाकेँ सरासर झूठ कहलक, जाहिमे ओ कहलनि कि सरकार विदेश जाएवला सर्वदलीय राजनयिक प्रतिनिधिमंडल सभक लेल नाम नहि मंगलक। कांग्रेस कहलक कि विपक्षी पार्टीसँ चुनल नामकेँ स्वीकृति नहि देनाई ‘सस्ता राजनीति’ अछि। दोसर दिसि, पश्चिम बंगालक मुख्यमंत्री ममता बनर्जी कहलनि कि हुनक पार्टी सर्वदलीय राजनयिक मिशन केर बहिष्कार नहि कएने अछि। ओ स्पष्ट कएलनि कि टीएमसी कोनो तरहक एकतरफा निर्णयकेँ स्वीकार नहि करत।
कांग्रेस महासचिव जयराम रमेश प्रधानमंत्री नरेंद्र मोदी पर कटाक्ष करैत कहलनि, जे प्रधानमंत्री ऑस्ट्रेलिया, अमेरिका, कतर, दक्षिण कोरिया आ चीन जेकाँ देश सभमे कांग्रेसकेँ सार्वजनिक रूपसँ गरिया चुकल छथि, आई ओ प्रतिनिधिमंडल सभमे विपक्षी पार्टीक मदद लऽ रहल छथि। रमेश कहलनि, ‘प्रधानमंत्री फोन कियैक नहि उठौलनि आ कांग्रेस अध्यक्ष मल्लिकार्जुन खरगे एवं लोकसभामे विपक्षक नेता राहुल गांधीसँ बात कियैक नहि कएलनि ? एहेन बड़ाई केर शिष्टाचार कियैक नहि देखेलनि ? सच ई अछि कि देशमे ध्रुवीकरणक राजनीति केर कारण हमर सभक कहानी पंक्चर भऽ चुकल अछि आ पंक्चर होइत जा रहल अछि।
जनतब जे काँग्रेस शनिकेँ कहलक, सरकार हुनका पाकिस्तान समर्थित आतंकवाद पर भारतक रुख स्पष्ट करबाक लेल सर्वदलीय प्रतिनिधिमंडल लेल चारिटा नेताक नाम देबाक लेल कहलक। काँग्रेस आनंद शर्मा, गौरव गोगोई, सैयद नसीर हुसैन आ अमरिंदर सिंह राजा वड़िंगकेँ नामित केलक। मुदा, एहि चारूमेसँ मात्र शर्माकेँ नाम सात प्रतिनिधिमंडलमे शामिल कएल गेल अछि।
ओम्हर, पश्चिम बंगालक मुख्यमंत्री ममता बनर्जी विदेश मामिलाक मुद्दा पर केंद्र सरकारक कार्य आ विचारक समर्थन केलनि। ओ कहलनि जे हुनकर पार्टी पाकिस्तान प्रायोजित आतंकवादक मुकाबला करबाक उद्देश्यसँ सर्वदलीय राजनयिक मिशनक बहिष्कार नहि कयलक अछि। एकर संग सीएम ममता ई सेहो स्पष्ट केलनि जे टीएमसी कोनो तरहक एकतरफा निर्णयकेँ स्वीकार नहि करैत अछि।
सर्वदलीय प्रतिनिधिमंडलकेँ सूचीमे टीएमसी सांसद यूसुफ पठानक नाम पर सीएम ममता कहलनि कि केन्द्र नाम तय नहि कऽ सकैत अछि। जँ ओ मूल पार्टीसँ अनुरोध करैत अछि, तँ पार्टी नाम तय करत। ई एकटा प्रथा आ प्रणाली अछि। ओ कहलनि कि हम विदेश मामिलाकेँ नीतिसँ संबंधित केन्द्र सरकारक संग छी आ हम पूरा समर्थन करैत छी। ममता कहलनि कि हमरा किछु अनुरोध नहि आएल अछि। ओ जोर देलनि कि जँ सरकार हुनकासँ सम्पर्क करत तँ पार्टी सर्वदलीय प्रतिनिधिमंडल लेल अपन प्रतिनिधि भेजत।
आगु केंद्र सरकार कांग्रेससँ शाशि थरूरकेँ आतंकवादक खिलाफ भारतक संदेशक लेल प्रतिनिधिमंडल लेल चयन कयलक। जाहिसँ कांग्रेसकेँ आपत्ति अछि।
