दुनियासँ कम्युनिस्ट आ देशसँ कांग्रेस समाप्त भ’ रहल, आब केरलमे एनडीए केर बारी : अमित शाह
कुन्नाथुनाडु । समदिया
केंद्रीय गृह मंत्री अमित शाह कुन्नाथुनाडुमे एकटा जनसभाकेँ संबोधित करैत कहलनि जे भारतमे सभसँ पहिने जँ कोनो राज्य शिक्षित बनल त’ से केरल अछि। एत’ केर युवा पढ़ल-लिखल आ बुद्धिमान छथि, मुदा हुनका सभकेँ रोजगार नहि भेटि रहल अछि। हम एहेन केरल बनाब’ चाहैत छी जत’ युवासभकेँ एतहि रोजगार भेटय आ हुनका विदेश, खास क’ गल्फ देश सभमे जाए केर जरूरत नहि पड़य।
ओ कहलनि जे आब पूरा दुनियामे बदलाव आबि रहल अछि। कम्युनिस्ट पार्टी दुनियासँ खत्म भ’ रहल अछि आ कांग्रेस पूरा देशसँ समाप्त भ’ रहल अछि। आइ पूरा देश प्रधानमंत्री मोदी केर नेतृत्वमे आगाँ बढ़ि रहल अछि। 2014 केर लोकसभा चुनावमे केरलसँ एनडीएकेँ मात्र 14% वोट भेटल छल, मुदा आब एत’ एनडीए केर सरकार बनेबाक समय आबि गेल अछि।
अमित शाह कहलनि जे ई चुनाव मात्र सरकार बदलबाक लेल नहि अछि, बल्कि केरल केर उज्ज्वल भविष्य सुनिश्चित करबाक लेल अछि। बरखोसँ केरल केर जनता UDF आ LDF केँ बारी-बारीसँ चुनैत आबि रहल अछि, मुदा दुनू पार्टी भ्रष्टाचारमे लिप्त रहल अछि। जँ सच्चा विकास चाहैत छी त’ प्रधानमंत्री मोदी केर नेतृत्वमे एनडीए केर सरकार चुन’ पड़त।
ओ कहलनि जे BJP केर नीति साफ अछि—सभकेँ न्याय, ककरो तुष्टिकरण नहि। जखनि PFI केँ देश विरोधी गतिविधिमे शामिल पाओल गेल, त’ BJP एक्के दिनमे ओकर सभ कैडरकेँ गिरफ्तार क’ तेजीसँ कारवाई कयलक। ओ कहलनि जे BJP सरकार वक्फ संशोधन बिल सेहो पेश कयलक। एर्नाकुलममे वक्फ बोर्ड 400 एकड़ जमीन पर कब्जा कयलक, जे असलमे करीब 600 ईसाई आ हिंदू परिवार केर छल। संसदमे जखनि एहि बिल पर चर्चा भ’ रहल छल, तखनि LDF आ UDF एहि परिवार सभ केर आवाज नहि उठौलनि।
ओ आरोप लगौलनि जे कांग्रेस आ कम्युनिस्ट पार्टी देश केर अन्य हिस्सामे मिलि क’ चुनाव लड़ैत अछि, मुदा केरलमे एक-दोसरा सँ मुकाबला करैत अछि। हालहिमे राहुल गांधी केर केरल यात्रा पर तंज कसैत कहलनि जे राहुल आ विजयन एक-दोसर पर BJP केर “B टीम” होएबाक आरोप लगबैत छथि, मुदा एहि बेर BJP “A टीम” रहत आ विरोधी “B टीम” बनत।
अमित शाह मुख्यमंत्री विजयन पर आरोप लगौलनि जे ओ केंद्र सरकार केर योजनाके नाम बदलि क’ अपन नामसँ चलबैत छथि। उदाहरण स्वरूप, प्रधानमंत्री मोदी द्वारा भेजल 5 किलो मुफ्त चाउरकेँ कम्युनिस्ट योजना बताक’ बांटल जा रहल अछि।
ओ सबरीमाला मंदिर मामिला पर कहलनि जे सोना लूटबाक आरोपित सभकेँ जेलमे हेबाक चाही। UDF आ LDF एहिमे कार्रवाई नहि करत, मुदा NDA सरकार बनलापर दू महीनाक भीतर दोषी सभकेँ जेल पठा देल जायत।
अंतमे ओ राहुल गांधी पर तंज कसैत कहलनि जे हुनका जेकाँ झूठ्ठा नेता ओ कोनो नहि देखलनि। पेट्रोल दाम पर टिप्पणी करैत कहलनि जे 460 रुपया प्रति लीटर पेट्रोल केरलमे नहि, बल्कि पाकिस्तानमे अछि।
