डा नरेन्द्र कुमार झा ‘बालक’ केर निधन पर आम आ खास लोक जतेलनि शोक
दरभंगा समदिया
*
एमएलएसएम कॉलेजक इतिहास विभागक शिक्षक डा नरेन्द्र कुमार झा ‘बालक’ केर असामयिक निधन वृहस्पति दिन साँझमे भऽ गेलनि। 63 वर्षीय डा झा बहुत दिनसँ गंभीर रूपें बीमार चलि रहल छलाह। हुनकर निधन केर खबरि भेटिते बेनीपुरक विधायक प्रो विनय कुमार चौधरी, विद्यापति सेवा संस्थानक महासचिव डा बैद्यनाथ चौधरी बैजू, मैथिली अकादमीक पूर्व अध्यक्ष पं कमलाकांत झा, डा संजय कुमार झा, प्रो जीवकांत मिश्र आदि हुनक आवास पर पहुँचि पार्थिव शरीर पर माल्यार्पण कऽ भावपूर्ण श्रद्धांजलि अर्पित कयलनि।
शोक प्रकट करैत बेनीपुरक विधायक प्रो विनय कुमार चौधरी हुनक निधनकें शैक्षणिक जगत लेल अपूर्णीय क्षति बतबैत कहलनि जे स्वाभिमान आ विश्वाससँ गहींर रिश्ता रखनिहार समाजसेवी शिक्षक केर रूपमे हुनक कमी सदति खलत।
विद्यापति सेवा संस्थानक महासचिव डॉ बैद्यनाथ चौधरी बैजू हुनक निधनकेँ शैक्षणिक एवं सामाजिक क्षेत्र लेल अपूर्णीय क्षति बतबैत कहलनि जे हुनक निधनसँ एकटा कर्तव्यनिष्ठ शिक्षक आ समर्पित समाजसेवीकेँ हमरा लोकनि समयसँ पहिले हेरा देलहुँ। ओ कहलनि जे बालक जी अपना व्यवहारसँ नहिं केवल सबहक मोन जीतबामे माहिर छलाह अपितु शिक्षा केर क्षेत्रमे अलख जगेबाक संग-संग सामाजिक कार्यक प्रति हुनकर समर्पण सराहनीय आ अनुकरणीय छल।
मैथिली अकादमीक पूर्व अध्यक्ष पं कमला कांत झा हुनकर निधनकेँ मिथिलाक शैक्षणिक आ सामाजिक जगत लेल अपूर्णीय क्षति बतौलनि।
