तेज प्रताप कहलनि, ‘शुरुआत अहाँ कयलौंह मुदा अंत हम करब।’
तेज प्रताप जे पोस्ट कएलनि अछि, ताहि संग ओ एकटा तस्वीर शेयर कएलनि अछि। ओहिमे तेज प्रताप उज्जर कुर्ता आ हरियर टोपीमे देखाइत छथि। ओ ठाढ़ भऽ अपन पिताक तस्वीर देखि रहल छथि।
आरजेडी सुप्रीमो लालू प्रसाद यादव अपन पैघ बेटा तेज प्रतापकेँ किछु दिन पहिने पार्टीसँ छह वर्षक लेल निष्कासित कए चुकल छथि। एतबहि नहि, परिवारसँ सेहो बाहर कए देलनि। एहि बीच तेज प्रताप यादव बृहस्पतिकेँ एकटा बड़का बयान देलनि अछि।
बृहस्पति (19 जून, 2025) केँ ओ अपन एक्स अकाउंट पर एकटा पोस्ट कएलनि आ सीधा-सीधा चेतौनी देलनि। तेज प्रताप यादव अपन पोस्टमे लिखलनि अछि, “हमर खामोशीकेँ हमर कमजोरी बुझय केर भूल करयवला सभ, ई नहि बुझू जे हमरा अहाँक साजिशक बारेमे पता नहि अछि, शुरुआत अहाँ कयलौंह, अंत हम करब। झूठ आ फरेबसँ बनल एहि चक्रव्यूहकेँ तोड़य जा रहल छी। तैयार रहु। सच सामने आबयवाला अछि। हमर भूमिका हमर प्रिय जनता आ माननीय सर्वोच्च न्यायालय तय करत, कियो दल वा परिवार नहि।”
तेज प्रताप यादव एक्स पर जे पोस्ट कएलनि अछि, तकरा संगे ओ एकटा तस्वीर सेहो शेयर कएलनि अछि। तस्वीरमे तेज प्रताप यादव उज्जर कुर्ता पहिरने देखाइत छथि। सिर पर हरियर टोपी अछि आ ओ अपन पिता लालू यादवक तस्वीर दिसि देखैत ठाढ़ छथि।
एक्स पर पोस्टक बाद यूजर सब एकसँ एक कमेंट कऽ रहल छथि। सुबोध यादव नामक एकटा यूजर लिखलन्हि, “सर्वोच्च न्यायालयसँ किछु बुझा नहि रहल अछि। पार्टीसँ गलत तरिकासँ निकालय केर कारण न्यायालयक शरणमे जाएब की ? एहि सभसँ अपने पार्टीक नोकसान होयत, जे भेल से भेल। ओ अहाँक परिवार अछि, परिवारमे ई सभ होइत रहैत अछि। एहिसँ आगू बढ़ब नीक संकेत नहिं मानल जायत भैया।”
जनतब जे अनुष्का यादव प्रकरण मामिलाक बादसँ तेज प्रताप परिवारसँ दूर छथि। ओ कतेको बेर इमोशनल पोस्ट कए चुकल छथि। कतेको बेर ओ ‘जयचंद’ केर ज़िक्र कऽ चुकल छथि। आब देखबाक अछि जे तेज प्रताप यादव आगू की करैत छथि।
