प्रधानमंत्री नरेंद्र मोदीकेँ श्रीलंका केर सर्वोच्च नागरिक सम्मान ‘श्रीलंका मित्र विभूषण’ शनिकेँ श्रीलंकाक कोलंबोमे प्रदान कएल गेल। ई सम्मान श्रीलंकाक राष्ट्रपति अनुरा कुमारा दिसानायके एकटा भव्य समारोहमे हुनका सौंपलथि।
ई सम्मान मात्र ओहि राष्ट्राध्यक्ष सभकेँ देल जाइत अछि जे श्रीलंका संग मित्रता आ सहयोगकेँ विशेष रूपसँ आगाँ बढ़ौने होए। राष्ट्रपति दिसानायके कहलथि जे “प्रधानमंत्री मोदी एहि सम्मानक वास्तविक हकदार छथि।” ओतहग पीएम मोदी एकरा 140 करोड़ भारतीयक सम्मान बतौलथि आ कहलथि जे ई दुनू देशक साझा विरासत आ साझा भविष्यक प्रतीक अछि।
ई खासतौर पर डिजाइन कएल गेल सम्मान धर्म चक्र, पुण्य कलश आ नवरत्नसँ सजल कमलक प्रतीक रूपमे भारत-श्रीलंका केर साझा सांस्कृतिक आ बौद्ध विरासतकेँ दर्शाबैत अछि। ई प्रधानमंत्री मोदीकेँ कौनो विदेशी देशसँ भेटल 22म अंतरराष्ट्रीय सम्मान अछि।
समारोहक दौरान दुनु नेता संपूर सौर ऊर्जा परियोजना आ डांबुला कृषि भंडारण केंद्र समेत कतेको द्विपक्षीय विकास परियोजनाक प्रारंभ कएलनि। संगहि ऊर्जा, डिजिटल परिवर्तन आ त्रिपक्षीय सहयोग पर कतेको महत्वपूर्ण सम्झौता भेल। तकर संगहि भारत, श्रीलंका आ यूएई मिलि कऽ त्रिंकोमालीकेँ एकटा ऊर्जा केंद्रक रूपमे विकसीत करत।
भारत एखन धरि श्रीलंकाकेँ लगभग 7 अरब डॉलरक सहायता दऽ चुकल अछि, जाहिमे 780 मिलियन डॉलर अनुदानक रूपमे समाहित अछि। बीतल दशकमे भारत 265 मिलियन डॉलरसँ बेसीक 40 सँ बेसी परियोजना पूरी कऽ चुकल अछि। भारतक 2 अरब डॉलरसँ बेसीक निवेश श्रीलंकाक अर्थव्यवस्था केर मजबूती द’ रहल अछि।
राष्ट्रपति दिसानायके भारत-श्रीलंका सम्बन्धकेँ “इतिहास, धर्म आ संस्कृतिसँ बंधल विशेष रिश्ता” कहलथि आ कहला कि ई साझेदारी दक्षिण एशियामे स्थिरता आ विकासक उदाहरण बनि रहल अछि।
