केंद्रीय गृहमंत्री अमित शाह केर आगमनसँ पहिने शुक्रदिन मुख्यमंत्री नीतीश कुमार पुनौरा धामक दौरा कयलनि। 12:20 बजे उपमुख्यमंत्री सम्राट चौधरी, जल संसाधन मंत्री विजय चौधरी आ जदयू केर कार्यकारी राष्ट्रीय अध्यक्ष संजय झा सेहो मुख्यमंत्री केर संग मंदिर परिसर पहुंचलाह। मुख्यमंत्री पहिने माता सीताकेँ पूजा कयलनि, फेर मंदिर परिसरक निरीक्षण केलनि।
उर्विजा कुंड सहित विभिन्न स्थलक निरीक्षण करैत 8 अगस्तकेँ प्रस्तावित भूमि पूजन कार्यक्रमक तैयारीक संबंधमे अधिकारीकेँ आवश्यक निर्देश देलथि। मुख्यमंत्री करीब 15 मिनट तक पुनौरा धाममे रहलाह आ भव्य मंदिरक निर्माण केर तैयारीक समीक्षा कयलथि। एकर बाद सड़क मार्गसँ डुमरा स्थित जदयू सांसद देवेश चंद्र ठाकुरक आवास पर पहुंचलाह, ओतय ओ भोजन कय पार्टीक नेतासँ भेंट कयलथि। तकर बाद डुमरा एयरपोर्ट ग्राउंडसँ पटना लेल विदा भेलाह।
जनतब जे 8 अगस्तकेँ अयोध्याक तर्ज पर माता सीताक भव्य मंदिरक भूमि पूजन पुनौरा धाममे होबय वाला अछि। एहि ऐतिहासिक अवसर पर केंद्रीय गृहमंत्री अमित शाह आ मुख्यमंत्री नीतीश कुमार दुनू गोटे उपस्थित हेताह। कार्यक्रमक तैयारी जोर शोरसँ चलि रहल अछि। हालहिमे नीतीशक मंत्रिमंडल एहि मंदिरक निर्माण लेल 883 करोड़ टाकाक राशिक मंजूरी देलनि अछि। मंदिरक संरचना सेहो तैयार भs गेल अछि।
मुख्यमंत्रीक दौराक बाद मंदिरक महंत कौशल किशोर दास कहला जे सीएम नीतीश स्वयं भूमि पूजनक तैयारीक निरीक्षण करबा लेल आयल छलथि। ओ कहलनि जे माँ सीता केर सपना छल जे पहिने भगवान श्री राम केर मंदिर बनय आ फेर हुनकर मंदिर। आब ओ शुभ दिन आबि गेल अछि। महंत प्रधानमंत्री नरेंद्र मोदी आ मुख्यमंत्री नीतीश कुमार केर प्रति आभार व्यक्त करैत कहलनि कि मोदी सरकारमे हिन्दू आस्थासँ जुड़ल जगह केर तेजीसँ विकास भs रहल अछि। ओ विश्वास व्यक्त कयलनि जे आगामी दिनमे पूरा दुनियामे “सीतामढ़ी” केर नाम स्वर्ण अक्षरमे लिखल जायत आ हर बच्चाकेँ जानकारी होयत जे माँ सीता केर जन्मभूमि कतय अछि।
