सीएम नीतीश कुमारक बुधकेँ संभवतः अंतिम केबिनेट मीटिंग

पटना । समदिया

बिहारक मुख्यमंत्री नीतीश कुमार बुधदिन कैबिनेट मीटिंग बजेने छथि। एहि संबंधमे कतेको तरहक चर्चासभ चलि रहल अछि। सूत्र सभक मुताबिक, ई बैठक हुनकर कार्यकालक आखिरी कैबिनेट बैठक होयबाक संभावना अछि। ई बैठक मुख्य सचिवालयमे होयत। एहिमे सभ मंत्री आ उपमुख्यमंत्री सामिल रहताह। एहिमे किछु महत्वपूर्ण निर्णयसभ पर मुहर लगि सकैत अछि।

नीतीश कुमार हालहिमे राज्यसभाक लेल चुनल गेल छथि। ओकरा बाद हुनकर विधान परिषदक सदस्यतासँ इस्तीफा सेहो भ’ गेल अछि। जानकारीक अनुसार, 10 अप्रैलकेँ ओ राज्यसभाक सदस्यक रूपमे शपथ लेताह। ओकरा बाद ओ प्रधानमंत्री नरेन्द्र मोदी आ गृह मंत्री अमित शाह शाहसँ भेंट क’ सकैत छथि।

राजनीतिक गलियारामे ई सेहो चर्चा अछि जे बिहारमे शीघ्रहि सत्ता परिवर्तन भ’ सकैत अछि। कहल जा रहल अछि जे एनडीएक भितर नव रणनीति बनि रहल अछि आ मुख्यमंत्री पद ककरो नव चेहराक देल जा सकैत अछि। भाजपाक साम्राट चौधरी, नित्यानंद राय, दिलीप जायसवाल आ विजय कुमार सिन्हाक नाम एहि दौड़मे सामने आबि रहल अछि। एखनि धरि ककरो नाम पर आधिकारिक मुहर नहि लागल अछि।

सूत्रक अनुसार, नीतीश कुमार 13 अप्रैलक आस-पास मुख्यमंत्री पदसँ इस्तीफा दऽ सकैत छथि आ ओकर बाद 14 अप्रैलकेँ एनडीए केर बैठकमे नव नेता केर चयन भऽ सकैत अछि। ईहो बातो कहल जा रहल अछि जे 16 अप्रैलक बाद बिहारकेँ नव मुख्यमंत्री भेटि सकैत अछि। एहि सभ बात पर एखनि धरि कोनो आधिकारिक घोषणा नहि भेल अछि, मुदा लगातार बढ़ैत राजनीतिक गतिविधिसँ संकेत भेटि रहल अछि जे बिहारमे पेघ बदलाव होयबवला अछि।