समस्तीपुरसँ केन्द्रीय मंत्री चिराग पासवानकेँ कथित रूपसँ धमकी देबाक आरोपमे एकटा व्यक्तिकेँ गिरफ्तार कयल गेल अछि। चिराग पासवानकेँ एकटा व्यक्ति धमकी देलक जे अपन मोबाइल फोनसँ इंस्टाग्राम पर एकटा टिप्पणी पोस्ट कयलक। आरोपी २१ वर्षीय मोहम्मद मेराज अछि, जे लोजपाक राष्ट्रीय अध्यक्षकेँ मारबाक धमकी देने छल।
आरोपीक खिलाफ पटना साइबर पुलिस स्टेशनमे लिखित शिकायत दर्ज करायल गेल अछि। ई जानकारी पार्टीक मुख्य प्रवक्ता डॉ. राजेश भट्ट देलनि। आब पुलिस आरोपी मोहम्मद मेराजकेँ बंदी बना लेलक अछि आ आगूक कारवाई जारी अछि।
हालाँकि एखनि एहि बातक जानकारी नहि भेटल अछि जे ओ चिराग पासवानकेँ धमकी कियैक देने छल। पुलिस ओकरासँ पूछताछ क’ रहल अछि। चिराग पासवान हाजीपुर सीटसँ बंपर जीत हासिल कएने छलाह। ओ प्रधानमंत्री मोदीक कैबिनेटमे मंत्री छथि। सक्रिय राजनीतिमे अएबाक पूर्व चिराग बॉलीवुड अभिनेता सेहो रहल छथि।
फिल्म इंडस्ट्रीसँ अपन करियर केर शुरुआत क’ चिराग पासवान आब अपन पिता रामविलास पासवानक राजनीतिक विरासतकेँ आगू बढ़ा रहल छथि। ओ अपन बेबाक बयानक लेल जानल जाइत छथि। बिहारक युवा नेता छथि आ बिहारक राजनीतिमे सक्रिय भूमिका निभबय चाहैत छथि।
