चिराग पासवान बजट २०२४ लेल प्रधानमंत्री मोदी आ वित्त मंत्रीकेँ धन्यवाद देलनि। ओ कहलनि जे एहि बजटमे बिहारक ध्यान राखल गेल अछि।
केंद्रीय बजट अयलाक बाद बिहारक बारेमे राजनीतिक प्रतिक्रिया आबय लागल अछि। केन्द्रीय मंत्री चिराग पासवान मंगल दिन कहलनि जे ई बजट सबके विश्वाससँ सबके विकास करैत विकसित भारतक संकल्प केर मजबूत करय जा रहल अछि। प्रधानमंत्रीकेँ बिहार आ बिहारीसँ विशेष लगावक परिणाम अछि जे एहि बजटमे बिहारक बहुत ध्यान राखल गेल अछि आ ‘विकसित बिहार-समृद्ध बिहार’ केर सपना पूरा करय लेल कतेको महत्वपूर्ण परियोजना बिहारकेँ उपहारमे देल गेल अछि।
आगू चिराग कहलनि एहि लेल हम देशक लोकप्रिय प्रधानमंत्री माननीय नरेन्द्र मोदी आ केन्द्रीय वित्त मंत्री माननीय निर्मला सीतारमण जीकेँ धन्यवाद दैत छी। हम आ हमर पार्टी लोजपा रामविलास एहि समावेशी बजटक स्वागत करैत अछि।
चिराग पासवान कहलनि जे २०२४-२५ केर ई आम बजट अमृतकालक एकटा महत्वपूर्ण बजट अछि। ई एकटा एहन बजट अछि जे ‘बिहार प्रथम-बिहारी प्रथम’क अवधारणाकेँ लागू करत। संगहि, ई एकटा एहन बजट अछि जे देशकेँ विकास आ प्रगतिक पथ पर लऽ जाइत अछि। देशवासीक सपना पूरा करबाक आ विकसित भारतक संकल्प पूरा करबाक लेल एहि बजटक माध्यमसँ एकटा मजबूत नींव राखल गेल अछि। ई बजट भारतक आर्थिक समृद्धिकेँ आकार देबामे महत्वपूर्ण भूमिका निभाओत। एहि बजटमे गरीब, युवा, किसान, मध्यम वर्ग आ महिला शक्तिक ध्यान राखल गेल अछि।
संगहि विशेष राज्यक दर्जाक मुद्दा पर विपक्ष के आरोप पर केंद्रीय मंत्री कहलनि, जे कहि रहल छथि जे बिहारकेँ विशेष राज्यक दर्जा नहिं भेटल, ई वैऽह विपक्षी लोक छथि जिनकर सरकारमे, यूपीए सरकारमे नीति आयोगमे एहन प्रावधान कयल गेल छल, जेकर बाद कोनो राज्यकेँ विशेष दर्जा देब लगभग असंभव छल। मुदा, हमर माँग छल जे जाबत धरि विशेष राज्यक दर्जा नहिं भेटत ताबत धरि हमरासभकेँ एकटा विशेष पैकेज देल जाय।
