मैथिल समाज सेवा संस्था (मीरा भाईंदर) विगत ८ वर्षसँ समाजक उत्थान आ समाजकेँ जोड़बाक लेल निरन्तर किछु कार्यक्रम करैत आबि रहल अछि, जाहिमे शिक्षा आ वृत्तिकेँ ध्यानमे राखि छात्र-छात्रा लेल मार्गदर्शन, सम्मान आ सहयोग कार्यक्रमक आयोजन कयल जाइत अछि।
विद्यार्थी प्रतिभा सम्मानक आयोजन २१ जुलाई २०२४ केँ मीरा रोडक ‘भारत रत्न लता मंगेशकर नाट्यगृह’ मे कयल जा रहल अछि। संस्थाक पूर्व अध्यक्ष अरुण चौधरी कहलनि जे कार्यक्रममे आईएएस, आईपीएस, एमबीबीएस, सीए आ अन्य पेशेवरक सङ्ग कला आ व्यवसायक क्षेत्रमे सफल आ सम्मानित वक्ताकेँ आमंत्रित कयल गेल अछि। ई सभ वक्ता छात्रसभकेँ अपन-अपन विषय पर मार्गदर्शन करत।
संस्थाक सचिव दीपक झा जनतब देलनि जे केन्द्रीय खाद्य प्रसंस्करण आ उद्योग मंत्री चिराग पासवान मुख्य अतिथिक रूपमे कार्यक्रममे भाग लऽ रहल छथि। सांसद नरेश म्हस्के, विधायक प्रताप सरनाईक, विधायक गीता जैन, पूर्व विधायक नरेन्द्र मेहता, रवि व्यास, आईजी कृष्ण प्रकाश, पुलिस आयुक्त मधुकर पांडेय सहित अन्य गणमान्य व्यक्ति उपस्थित रहताह। कार्यक्रममे छात्र-छात्राकेँ मार्गदर्शनक संग परीक्षामे हुनकर प्रदर्शनक अनुसार जरूरतमंद छात्रकेँ आतिथ्य आ आर्थिक सहायता सेहो देल जायत। संस्थाक अध्यक्ष सीए नीलेश चौधरी, उपाध्यक्ष डॉ. राकेश झा, संयुक्त कोषाध्यक्ष पवन झा, अधिवक्ता रामुदर झा, ललित झा, अनूप सत्यनारायण झा, प्रोफेसर कृष्ण कुमार झा, मनोरमा झा, राजू मिश्रा, संजय राय, विनोद साओ सहित अन्य सब पदाधिकारी आ सदस्य एहि कार्यक्रमकेँ सफल बनेबाक लेल खूब तैयारी कऽ रहल छथि।
चिराग पासवान भारत सरकारमे कैबिनेट मंत्री पद ग्रहण कएलाक बाद पहिल बेर महाराष्ट्र आबि रहल छथि, प्रवासी बिहारीकेँ हुनकासँ बहुत उम्मीद अछि। मानल जा रहल अछि जे मंत्रीसँ इहो अनुरोध कयल जायत जे मुम्बईमे रहनिहार बिहारी लेल मुम्बईसँ बिहार, विशेष रूपसँ मिथिला तक यात्रा करबाक कठिनाई पर ध्यान देल जाय। विमानन आ रेल यातायातक सुविधा कोना देल जाय ई एकटा गम्भीर विषय अछि।
