कहल जाइत अछि जे मारनिहार सँ पैघ बचेनिहार होइत अछि। किछु एहने रविदिन बिहारक जहानाबाद जिलाक कड़ौना थाना क्षेत्रमे देखबा लेल भेटल, जतय प्रधानमंत्री नरेंद्र मोदीक ‘हनुमान’ कहल जाय बला केंद्रीय मंत्री आ लोजपा (रामविलास) केर प्रमुख चिराग पासवान सड़क पर पड़ल एक घायल युवककेँ अस्पताल पहुँचेलनि।
चिराग पासवान रविदिन पटना’सँ गया जा रहल छलथि। एहि दौरान जहानाबाद हाइवे पर कोड़िहरा गाम लग सड़क दुर्घटनामे घायल शांतनु कुमार सड़क पर मददिक लेल तड़पि रहल छल। प्रत्यक्षदर्शी सभक अनुसार, जखनि केंद्रीय मंत्री घायल व्यक्तिकेँ देखलनि त’ अपना काफिला रोकि हुनका अपन गाड़ीमे ल’ क’ सदर अस्पताल पहुँच गेलथि आ हुनका भर्ती क’ देलथि। आनन-फाननमे तात्कालिक चिकित्सा सुविधा भेटलाक कारण घायल शांतनु कुमार आब खतरा’सँ बाहर बताओल जाइत छथि।
स्थानीय लोकनि कहलनि जे चिराग पासवान एम्बुलेंसक आबय केर इंतजार नहि कयलनि।
एम्हर, सहायक पुलिस निरीक्षक शाहनवाज खान कहलनि कि पुलिस लोदीपुर दिसि जा रहल छल। एहि बीच ई सूचना भेटल कि कोड़िहरा गामक कातमे सड़क दुर्घटना भेल अछि। एही घटना कऽ सूचना भेटलाक बाद पुलिस घटनास्थल पर पहुँचि गेल छल कि जानकारी भेटल जे कियो वाहनसँ घायल व्यक्तिकेँ ल’ गेल अछि। पुलिस दुर्घटनाक सूचना भेटलाक बाद तुरंत पहुँचैत अछि आ घायलकेँ उपचार उपलब्ध करबैत अछि।
जनतब जे बिहारमे सड़क दुर्घटनाक संख्या बढ़ल अछि। रविदिन बेगूसराय जिलाक लाखो थाना क्षेत्रमे एक स्कार्पियो सड़कक डिवाइडरसँ टकरा गेलाक कारण चारि लोकक मृत्यु भ’ गेल आ अन्य पाँच गंभीर रूपसँ घायल भेल छलथि।
