लोकसभा चुनावक बाद मुख्यमंत्री नीतीश कुमार आइ-काल्हि बहुत सक्रिय देखल जा रहल छथि। ओतहि शनि दिन सीएम नीतीश कुमारक स्वास्थ्यक बारेमे एकटा पैघ अपडेट सामने आयल अछि।
बिहारक मुख्यमंत्री नीतीश कुमारक स्वास्थ्य बिगड़ि गेल अछि। सीएम नीतीश मेदांता अस्पताल पहुँचि गेल छथि। शनि दिन भोरमे हुनका हाथमे दर्द महसूस भेलनि। हाथक दर्दक इलाजक लेल हुनका तुरन्त मेदांता अस्पताल लऽ जायल गेलनि। इलाजक लेल अस्थि रोग विभागमे हुनक जाँच कयल गेल। कहल जा रहल अछि जे जखन ओ भोरे उठलाह तखन हुनक हाथमे दर्द छलनि। हाथक दर्दक इलाजक लेल हुनका मेदांता अस्पताल लऽ जायल गेलनि।
लोकसभा चुनावक कारण सीएम नीतीशक दिनचर्या बहुत व्यस्त भऽ गेल छल। ओ लगातार चुनावक दौरा करैत छलाह। चुनाव परिणामक बाद ओ दिल्लीमे एनडीए सरकार बनेबाक लेल पार्टीक नेतासभसँ लगातार भेंट कऽ रहल छलाह। एकर अतिरिक्त ओ बिहारक काजक प्रति सेहो बहुत सक्रिय छलाह। पिछला दू दिनसँ लगातार बैठक कए रहल छलथि। पहिने अधिकारी सभक संग आ फेर अगिला दिन मंत्रिमंडलक बैसार बजौलनि। एहि सबहक बीच सीएम नीतीशकेँ बेसी आराम नहिं भेटल अछि। एम्हर हुनकर स्वास्थ्य बिगड़बाक सूचना भेटल अछि।
जनतब जे लोकसभा चुनावक दौरान सीएम नीतीशकें तबियत बिगड़ला केर खबरि छल। उपमुख्यमंत्री सुशील कुमार मोदीक निधनक बाद सेहो नीतीश कुमारक तबियत बिगड़ि गेल छल, एहि कारणेँ ओ सुशील कुमार मोदीक दाह संस्कार कार्यक्रममे सेहो नहिं पहुँचि सकल छलथि। एकर संगहि ओ प्रधानमंत्री नरेन्द्र मोदीक नामांकन पर सेहो नहिं जा सकल छलथि आ एहि दौरान चुनाव प्रचारक सभ कार्यक्रम रद्द कऽ देल गेल छल। संगहि इहो जानकारी आबि रहल अछि जे सीएम नीतीश कुमार नियमित जांचक लेल मेदांता अस्पताल पहुँचल छथि।
