बिहारक मुख्यमंत्री नीतीश कुमार लंदन दौरा पर छथि जतय ओ विज्ञान संग्रहालयक भ्रमण कयलनि। ओ कहलनि जे पटनाक साइंस सिटी लन्दनक विज्ञान संग्रहालयक तर्ज पर बनाओल जायत।
एहि दौरान नीतीश कुमार एहि संग्रहालयक विशेषताक जानकारी लेलनि। ओ कहलनि जे पटनामे बनाओल जा रहल साइंस सिटीकेँ लंदन साइंस म्यूजियम जकाँ बनाओल जायत।
ओ कहलनि जे पटनामे साइंस सिटी बनलाक बाद एतय आबय वाला छात्र विज्ञानक मूलभूत बात, गतिविधि आ सिद्धांत केर आसानीसँ बुझि सकत आ विज्ञानमे हुनकर रुचि बढ़त। एकरा लेल लन्दनक विज्ञान सङ्ग्रहालयक अनुरूप आधुनिक तकनीकक उपयोग कयल जायत।
मुख्यमंत्रीक संग बिहारक पूर्व मंत्री आ राज्यसभा सांसद संजय कुमार झा, मुख्यमंत्रीक प्रधान सचिव दीपक कुमार, भवन निर्माण विभागक सचिव कुमार रवि, ग्लोबल एंगेजमेंट साइंस म्यूजियम ग्रुपक निदेशक हेलेन जोनस, इंटरनेशनल एंगेजमेंट साइंस म्यूजियम ग्रुप मैनेजर शालिनी नारायण, साइंस म्यूजियम मेंटेनेंस मैनेजर फरगस काररोल, डॉ. ए.पी.जे. अब्दुल कलाम साइंस सिटीक प्रोजेक्ट कंसल्टेंट सुजीत कुमार उपस्थित छलाह।
