प्रधानमंत्री नरेंद्र मोदी रविकेँ हैदराबादक चारमीनार लग भीषण आगि दुर्घटनामे झुलसल लोकक प्रति संवेदना व्यक्त कएलनि अछि। पीएम मोदी पीएमएनआरएफसँ हर मृतक आ पीड़ितक लेल सहायता राशिक ऐलान कएलनि अछि।
पीएम मोदीक आधिकारिक एक्स हैंडलसँ मुआवजाक ऐलान कएल गेल अछि। लिखल गेल – आगिक घटनामे लोकक मृत्युक कारण बहुत दुःख भेल। जे लोक अपन प्रियजनकेँ गमेलनि, हुनका प्रति संवेदना व्यक्त करैत छी। घायल/झुलसल लोककेँ शीघ्र स्वास्थ्य लाभक कामना करैत छी। पीएमएनआरएफसँ प्रत्येक मृतक परिवारकेँ 2 लाख रुपया केर राशि देल जायत, ओतहि घायल सभकेँ 50,000 रुपया कऽ देल जायत।
जानकारीक अनुसार, हैदराबादमे रविकेँ एकटा इमारतमे भीषण आगि लागि गेल, जाहिमे 17 लोकक मृत्यु भऽ गेल आ किछु अन्य घायल भऽ गेल। ई घटना ऐतिहासिक इमारत चारमीनार लग गुलजार हाउसमे भेल। घटनाक सूचना मिलला पर दमकलकर्मी व्यावसायिक क्षेत्रक भीड़-भाड़ वाला गलीमे फंसल किछु लोककेँ बचौलक।
परिसरमे पसरल घनगर धुआं केर कारण किछु लोक बेहोश भ’ गेलाह। एतय मोती व्यापारी आ ओकर कर्मचारी परिवारक करीब 30 लोक उपस्थित छलाह। मोती व्यापारीक दोकान मोदी पर्ल्सक ग्राउंड फ्लोर पर छल, जखनकि ओकर परिवार आ किछु कर्मचारीक परिवार पहिलका मंजिल पर रहैत छल। आगि बुझाबए खातिर आठ दमकल गाड़ी लगाओल गेल। वरिष्ठ पुलिस अधिकारी घटना स्थल पर पहुंचल छलथि।
घटनास्थलक दौरा करबाक बाद केंद्रीय मंत्री जी. किशन रेड्डी सोशल मीडिया प्लेटफॉर्म ‘एक्स’ पर पोस्ट कएलनि। ओ लिखलनि, “हैदराबादक चारमीनार लग गुलजार हाउसमे दुर्घटनास्थलक निरीक्षण कएलहुं। बचाव आ राहत कार्यक विषयमे स्थिति केर संभारनिहार वरिष्ठ अधिकारीसँ चर्चा कएलौंह आ हुनकासँ तत्काल चिकित्सा सहायता आ मदद प्रदान करबाक आग्रह कएलौंह। भारत सरकार आवश्यक सहायता आ सहयोग प्रदान करत। हम राज्य सरकारसँ निवेदन करैत छी जे भविष्यमे एहेन दुर्घटनासँ बचबाक लेल इमारतक अग्नि सुरक्षा ऑडिट सहित सभ आवश्यक सावधानी बरतल जाए। एहि दुर्घटनामे जान गमेनिहार परिवारक प्रति हमर हार्दिक संवेदना आ घायलक शीघ्र स्वस्थ होबए केर प्रार्थना करैत छी।”
मुख्यमंत्री रेवंत रेड्डी दुर्घटना पर दुःख प्रकट कएलनि अछि। ओ आगिमे फँसल लोकक बचाबय लेल अधिकारीगणकेँ सभ डेग उठेबाक निर्देश देलनि अछि। मुख्यमंत्री कार्यालय (सीएमओ) केर अनुसार, मुख्यमंत्री पुलिस आ अग्निशामक विभागक अधिकारी सभक संग संपर्कमे छथि।
