बिहारमे लोकसभा चुनावक चारिम चरणक लेल दुनू गठबंधन अपन पूरा ताकत लगा देलक अछि। एहि चरणमे जेडीयू आ भाजपाक सामने चुनौती अपन सीट बरकरार रखबाक अछि। एहिमेसँ तीनटा सीटपर भाजपा एक दशकसँ कब्जा कएने अछि।
चारिम चरणमे मिथिला क्षेत्रीय बिहारक दरभंगा, बेगूसराय, मुंगेर, समस्तीपुर आ उजियारपुर लोकसभा क्षेत्रक मतदाता १३ मईकेँ अपन मताधिकारक प्रयोग करत। चारिम चरणक चुनावमे पूरा देशक नजरि बेगूसराय सीटपर अछि। एहि सीटपर राजगक गिरिराज सिंह आ महागठबंधनक अवधेश रायक बीच सीधा मुकाबला अछि। भाजपा पिछला १० सालसँ एहि सीट पर कब्जा कएने अछि। भाजपा पछिला दूटा आम चुनावमे अपन उम्मीदवार बदललक, मुदा अपन कब्जा बरकरार रखलक।
२०१४ केर आम चुनावमे भाजपाक भोला सिंह एहि सीटपर जीति गेलाह, जखन कि २०१९ केर आम चुनावमे भाजपा एहिठामसँ गिरिराज सिंहकेँ मैदानमे उतारलक। गिरिराज सिंह सेहो भाजपाक किला बचयबामे सफल रहलाह। गिरिराजक सामने एक बेर फेर एहि किलाकेँ बचाबय केर चुनौती अछि।
उजियारपुरसँ सेहो भाजपाक उम्मीदवार दूटा चुनावसँ जीत दर्ज कऽ रहल छथि। २०१४ मे नित्यानन्द राय भाजपाक टिकट पर एहि सीटपर जीति गेलाह। वर्ष २०१९ मे सेहो भाजपा नित्यानन्द रायकेँ मौका देलक आ ओ किलाकेँ बचयबामे सफल रहलाह। एहि बेर सेहो भाजपा फेरसँ नित्यानंद रायकेँ मैदानमे उतारने अछि, जतय हुनकर मुकाबला राजदक आलोक मेहतासँ अछि।
भाजपा २०१४ आ २०१९ केर आम चुनावमे दरभंगा लोकसभा सीटपर सेहो जीत हासिल कयलक। २०१४ केर लोकसभा चुनावमे भाजपाक कीर्ति आजाद एहि सीटपर जीति गेलाह, जखन कि २०१९ मे गोपालजी ठाकुर एहि सीटपर जीतलाह। एहि चुनावमे भाजपा एक बेर फेर गोपालजी ठाकुर पर दांव लगा देलक अछि। ठाकुरक मुख्य मुकाबला राजदक ललित यादवसँ अछि।
भाजपा के सामने दरभंगा, बेगूसराय आ उजियारपुर लोकसभा सीट पर अपन जीत बरकरार रखबाक चुनौती अछि, जखन कि मुंगेरसँ जदयू केर पूर्व अध्यक्ष ललन सिंहकेँ किला बरकरार राखब प्रतिष्ठाक सवाल बनि गेल अछि। पिछला चुनावमे ललन सिंह एतयसँ पैघ जीत हासिल कयने छलाह। ओहिसँ पहिने २०१४ मे सेहो ई सीट एनडीएक कब्जामे छल। तखन वीणा देवी एतयसँ लोजपाक टिकट पर जीतल छलीह। एहि चुनावमे ललन सिंहक मुकाबला राजदक अनिता देवीसँ अछि। समस्तीपुर सीट सेहो राजग लेल प्रतिष्ठाक सीट बनल अछि।
समस्तीपुरमे लोजपा (रामिवलास) शाम्भवी चौधरीकेँ मैदानमे उतारने अछि। २०१९ मे रामचन्द्र पासवान लोजपाक उम्मीदवारक रूपमे एहि सीटपर जीतने छलाह, यद्यपि हुनक पुत्र राजकुमार राज हुनक मृत्युक बाद भेल उपचुनाव जीतलनि।
२०१४ मे सेहो रामचंद्र पासवान लोजपाक टिकट पर एहि सीट पर जीति गेलाह। एहि चुनावमे शाम्भवीक मुकाबला कांग्रेसक सन्नी हजारीसँ अछि।
