केंद्रीय मंत्रिमंडलक बैठकमे किसान सभक लेल ब्याज छूट बनल रहबाक लेल पैघ निर्णय लेल गेल। रतलामसँ नागदाक बीच रेलवे लाइनक 4 लेन करबाक मंजूरी देल गेल अछि।
केंद्रीय मंत्रिमंडलक बैठकमे बुध दिन (28 मई 2025) कतेको महत्वपूर्ण निर्णय लेल गेल। केंद्रीय मंत्रिमंडल 2025-26 केर खरीफ सत्रक लेल धानक न्यूनतम समर्थन मूल्य (MSP) 69 टाका बढ़ा कऽ 2,369 टाका प्रति क्विंटल करबाक मंजूरी देल गेल. एहिमे 2 लाख 7 हजार करोड़ टाकाक खर्च आओत।
केंद्रीय मंत्री अश्विनी वैष्णव कहलथि, “किसान सभक लेल एकटा महत्वपूर्ण निर्णय लेल गेल अछि। पछिला 10-11 वर्षमे खरीफ फसिलक लेल एमएसपीमे भारी बढ़ोतरी कयल गेल अछि। एहि श्रंखलामे खरीफ मौसम 2025-26 लेल एमएसपी केर कैबिनेट द्वारा अनुमोदन कयल गेल अछि। कुल राशि लगभग 2,07,000 करोड़ टाका होयबाक अनुमान अछि। हर फसिलक लेल लागतक संग 50 प्रतिशत ध्यानमे राखल गेल अछि।
केंद्रीय मंत्री अश्विनी वैष्णव कहलनि जे किसान सभक लेल ब्याज छूट बनौने रखबाक फैसला लेल गेल अछि, जाहिमे 15 हजार 642 करोड़क खर्चा होएत। ओ कहलनि जे, “किसान क्रेडिट कार्ड (KCC) पर 2 लाख धरिक लोन 4 प्रतिशत ब्याज पर भेटत रहय तकर व्यवस्था कएल गेल अछि। देशमे 7.75 करोड़सँ बेसी किसान क्रेडिट कार्ड अछि। ई आब छोटका आ सीमांत किसान सभक लेल बड़ लाभदायक होयत।”
केंद्रीय मंत्री कहलनि, “केंद्रीय मंत्रिमंडल ब्याज सहायता योजनाकेँ स्वीकृति देलक अछि। अटल बिहारी वाजपेयीक प्रधानमंत्रीक समयमे किसान क्रेडिट कार्डक शुरुआत कएल गेल छल। एहिसँ किसान सभक लेल अपन कार्यक लेल लोन लेब बहुत आसान भऽ गेल अछि। एहि योजनामे किसान सभक लेल 4 प्रतिशत ब्याज पर 2 लाख रुपैया धरिक लोन भेटय केर ध्यान राखल गेल अछि। 2 लाख रुपैयाक लोन पर ककरो गारंटी नहि लेल जाएत।”
एहि केर संग मध्य प्रदेशक रतलामसँ नागदा केर बीच रेलवे लाइनक 4 लेन करबाक मंजूरी देल गेल अछि, जेकर लंबाई 41 किलोमीटर अछि। एहि ठाम महाराष्ट्रक वर्धा आ तेलंगानाक बल्लारशाह रेल लाइनकेँ सेहो 4 लेन करबाक निर्णय लेल गेल अछि।
