बिहारक उपमुख्यमंत्री विजय कुमार सिन्हा बृहस्पति दिन एक दिवसीय दौरा पर दरभंगा पहुंचलाह। एहि दौरान ओ प्रधानमंत्री नरेंद्र मोदीक नेतृत्वमे पिछला 11 सालमे भेल विकासक काजकेँ गिनाबैत केंद्र सरकारक प्रशंसा कयलथि।
पत्रकार सबसँ गप करैत उपमुख्यमंत्री विपक्ष पर कड़ा हमला करैत कहला जे इ देश आ बिहारक दुर्भाग्य अछि जे केंद्र आ राज्य दुनूमे विपक्षक नेता एकटा ‘पप्पू’ आ एकटा ‘अप्पू’ छथि। ई लोकनि अपना लेल नहि सोचैत छथि, दोसरक लिखल सामग्री आ सलाह पढ़ि देशक लोकक सोझाँ प्रस्तुत करैत छथि ।
कांग्रेस नेता राहुल गांधी आ राजद नेता तेजस्वी यादव पर निशाना साधैत ओ कहलनि जे, ई दुनू नेता सोनाक चम्मच ल’ क’ जन्म लेने छथि, चार्टर्ड विमानमे बैसल केक काटयवला ई लोक आम लोकक पीड़ा आ दुखकेँ कोना बुझताह।”
विजय सिन्हा तेजस्वी यादव पर आरोप लगाबैत कहलनि जे जखनि ओ उपमुख्यमंत्री छलाह तखनि दरभंगामे एकटा भयावह घटना घटल छल जाहिमे लाश पर पेशाब कयल गेल आ लोककेँ लाठीसँ पीटल गेल। ई लालू यादवक पापक परिणाम छल, जे राज्यमे महामारी केर तरह पसरल छल। ओ कहला जे एनडीए सरकार ओहि ‘राजनीतिक महामारी’क इलाज कs रहल अछि। दुर्भाग्यवश बीचमे विपक्षी सरकार आबि कs एकरा पोसैत रहल। मुदा आब जनता जागरूक भs गेल अछि आ विपक्षक सच्चाईकेँ जानब आबि गेल अछि।
मुजफ्फरपुर बलात्कार केसक जिक्र करैत उपमुख्यमंत्री कहलनि जे ओहि मामिलामे सरकार 12 घंटामे कारवाई करबाक बात कयने छल, मुदा हम सब मात्र 4 घंटामे अपराधी केर खिलाफ सख्त कारवाई कयलहुँ। हमर सरकार अपराधीकेँ सुरक्षा नै करैत अछि, बल्कि तत्काल कारवाई करैत अछि।
विजय सिन्हा कहलनि जे, कांग्रेस सरकार मात्र आतंकवादक मुद्दा पर बात करैत छल, जखनि कि हमर सरकार सीधा कारवाई करैत अछि। आतंकवादक खिलाफ हमर सरकारक नीति स्पष्ट अछि – जीरो टॉलरेंस। ‘ऑपरेशन सिन्दूर’क जिक्र करैत उपमुख्यमंत्री कहलथि कि ई खाली सैन्य कार्रवाई नै अछि, बल्कि भारत केर पहिचान, शक्ति आ सम्मानक प्रतीक बनि गेल अछि।
