नेपालसँ देवघर जा रहल बसकेँ ट्रकक टक्कर मारलासँ ३५ गोटे घायल

समस्तीपुर
*

मिथिला क्षेत्रीय बिहारक समस्तीपुरमे देर राति गतिक कहर देखल गेल। एतय तेज गतिसँ आबि रहल एकटा ट्रक एकटा बसकेँ टक्कर मारि देलक। टकरावक तीव्रता एतेक गम्भीर छल जे एहि घटनामे ३५ लोक घायल भऽ गेलाह। प्राप्त जानकारीक अनुसार ई घटना मुसरीघरारी चौराहा पर भेल अछि।
दोसर तरफ उत्तर प्रदेशक कानपुरमे सेहो एहने दर्दनाक दुर्घटना भेल छल। एतय सेहो ट्रक आ बसक टक्करमे कतेको लोक घायल भऽ गेलाह।

समस्तीपुरमे ई घटना तखन भेल जखन ४३ कांवरिया भगवान शिवक जलाभिषेक करबाक लेल नेपालसँ झारखण्डक देवघर जा रहल छलाह। ई दुर्घटना समस्तीपुरक मुसरीघरारी चौराहा पर भेल।

घायलसभकेँ लगक अस्पताल लऽ जायल गेल अछि। गम्भीर रूपसँ घायलसभकेँ इलाजक लेल समस्तीपुरक सदर अस्पतालमे रेफर कऽ देल गेल अछि। ओतहि किछु घायलक इलाज लगक क्लिनिकमे चलि रहल अछि। किछु बच्चाकेँ चोट सेहो लागल अछि। संगहि एहि पूरा घटनामे लगभग ८ लोकक स्थिति गम्भीर कहल जा रहल अछि।

नेपालसँ देवघर जा रहल एकटा कांवरिया कहलनि जे बसमे ४३ गोटे छलाह। ट्रकक टक्करमे सभगोटे घायल भऽ गेल, जिनकर इलाज अलग-अलग अस्पतालमे चलि रहल अछि।

दोसर तरफ उत्तर प्रदेशक कानपुरमे शम्भूहा ओवरब्रिज पर सेहो गतिक कहर देखल गेल। ट्रक आ रोडवेजक बसक बीच भयंकर टक्कर भेल। एहि दुर्घटनामे बस चालक सहित चारि गोटे घायल भऽ गेल। ट्रक चालक आधा घंटा धरि केबिनमे फँसल रहल। सूचना भेटलापर बिधनू पुलिस घटनास्थल पर पहुँचल। घायलसभकेँ तत्काल नजदीकी अस्पताल लऽ जायल गेल। प्राथमिक उपचारक बाद गम्भीर रूपसँ घायलसभकेँ जिला अस्पताल पठाओल गेल।