पाँच सय नोटक बंडल, सभक क्रम संख्या एक; १३ लाख टाकाक संग दू गोटे गिरफ्तार

मोतिहारी समादिया
*

मोतिहारी जिलामे कथित रूपसँ नकली नोट पहुँचेबाक प्रयास करबाक आरोपमे दूटा व्यक्तिकेँ गिरफ्तार कयल गेल अछि। वर्तमानमे पुलिस टीम एहि मामिलामे आगूक जाञ्चमे लागल अछि।
बिहारक मोतिहारी जिलामे नकली नोट लऽ जेबाक आरोपमे दूटा व्यक्तिकेँ गिरफ्तार कयल गेल अछि। इ आरोपी सभ लग लगभग १३ लाख टाकाक नकली नोट छल। ई सभ नोट ५०० रूपैयाक छल आ एके क्रम संख्याक छल। गुप्त सूचना भेटलाक बाद पुलिस दुनू आरोपीकेँ गिरफ्तार कऽ लेलक अछि।
एसपी कांतेश कुमार मिश्रकेँ सूचना भेटल छल जे किछु लोक फर्जी नोट पहुंचाबय लेल मोतिहारी आबि रहल अछि। एकर बाद पुलिस टीम जांच शुरू कयलक। जानकारीक अनुसार जहिना ई समाचार भेटल, एसपी एकटा टीम बनौलनि आ जाञ्चक आदेश देलनि। एकर बाद एसपी केर नेतृत्वमे कोटवा थाना क्षेत्र लग पुलिसक पूरा बल तैनात कयल गेल।
पुलिसक अनुसार एतय राजापुर मठिया लग दू गोटे बाइक पर जा रहल छल। पुलिस घेराबंदी कयलक आ एहि दूनू लोककेँ पकड़ि लेलक। जखन दुनू गोटेक तलाशी लेल गेल, तखन ओकरा सभ लगसँ १२,९०,००० रुपैया नकद अर्थात लगभग १३ लाख टाका बरामद कयल गेल। ई सभ नोट ५०० रूपैयाक छल आ एके क्रम संख्याक छल। एहि दौरान जखन पुलिस दुनूसँ सख्तीसँ पूछताछ कयलक तखन ओ कहलक जे दुनू उत्तर प्रदेशक निवासी अछि। ओकर नाम मुकेश राजभर आ जमील अख्तर अछि।
आरोपी सभ कहलक जे ओकरा ई नोट कतहु आन ठाम लऽ जेबाक छल, मुदा जे एहि नकली नोटक ई खेप लेबय जा रहल छल, ओ पुलिसकेँ झटका दैत भागि गेल। संगहि पुलिस टीम दुनू आरोपीकेँ हिरासतमे लेलक अछि। पुलिसक अनुसार आरोपीसँ आगू पूछताछ चलि रहल अछि। वर्तमानमे पुलिस द्वारा मामिलामे के सभ शामिल अछि, एकर जाँच कयल जा रहल अछि। जानकारी देबय वाला व्यक्तिक पहचान गुप्त राखल जाएत।